ប្រភពក្រសួងការពារជាតិទួរគី បាននិយាយនៅថ្ងៃព្រហស្បតិ៍នេះថា កងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃើដ មិនបានធ្វើសកម្មភាពស្របតាមកិច្ចព្រមព្រៀង ដែលខ្លួនបានចុះហត្ថលេខាជាមួយរដ្ឋាភិបាលស៊ីរី ក្នុងឆ្នាំនេះ ដើម្បីចូលរួមជាមួយស្ថាប័នរដ្ឋរបស់ប្រទេសនេះទេ ហើយការប៉ះទង្គិចនាពេលថ្មីៗនេះ រវាងក្រុមនេះ និងកងកម្លាំងរដ្ឋាភិបាល បានធ្វើឲ្យ ខូចខាតដល់ការរួបរួមរបស់ប្រទេសស៊ីរី។  

ប្រទេសទួរគី ចាត់ទុកកងកម្លាំង SDF ដែលគាំទ្រដោយសហរដ្ឋអាមេរិកថា ជាអង្គការភេរវកម្ម ហើយបាននិយាយម្តងហើយម្តងទៀតថា ខ្លួនរំពឹងថា ក្រុមនេះនឹងគោរពតាមកិច្ចព្រមព្រៀង ដើម្បីរំសាយអាវុធ និងសមាហរណកម្មទៅក្នុងកងទ័ពរបស់រដ្ឋស៊ីរី។

ប្រភពបានប្រាប់អ្នកយកព័ត៌មាននៅឯសន្និសីទមួយក្នុងទីក្រុងអង់ការ៉ាថា៖«វាមិនបានគេចផុតពីការយកចិត្តទុកដាក់របស់យើងទេដែលសំឡេងរបស់អង្គការភេរវកម្ម SDF កាន់តែខ្លាំងឡើង ដែលត្រូវបានផ្តល់អំណាច ដោយការប៉ះទង្គិចគ្នា នៅភាគខាងត្បូងនៃប្រទេសស៊ីរី~ ។

ប្រភពដដែល បានបន្ថែមថា៖«ការវាយប្រហាររបស់អង្គការភេរវកម្ម SDF នៅជាយក្រុង Manbij និងទីក្រុង Aleppo ប្រឆាំងនឹងរដ្ឋាភិបាលស៊ីរី ក្នុងរយៈពេលប៉ុន្មានថ្ងៃថ្មីៗនេះ បានធ្វើឲ្យប៉ះពាល់ដល់ឯកភាពគ្នាផ្នែកនយោបាយ និងបូរណភាពទឹកដីរបស់ប្រទេសស៊ីរី»។