រុស្ស៊ី និងឥណ្ឌាបានសង្កត់ធ្ងន់លើការប្តេជ្ញាចិត្តរបស់ប្រទេសទាំង២ ចំពោះ «ភាពជាដៃគូយុទ្ធសាស្ត្រ» អំឡុងកិច្ចពិភាក្សាសន្តិសុខទ្វេភាគី នៅទីក្រុងមូស្គូ នាថ្ងៃព្រហស្បតិ៍ (ទី៧ ខែសីហា) នេះ ពោលគឺមួយថ្ងៃបន្ទាប់ពីប្រធានាធិបតីអាមេរិក លោក Donald Trump បានប្រកាសដំឡើងពន្ធខ្ពស់លើការនាំចូលពីឥណ្ឌា ដោយសារតែការទិញប្រេងពីរុស្ស៊ី។

ហើយទីភ្នាក់ងារសារព័ត៌មាន Interfax បានដកស្រង់សម្តីទីប្រឹក្សាសន្តិសុខជាតិឥណ្ឌា លោក Ajit Doval ដែលបាននិយាយថា ទីក្រុងញូវដេលីកំពុងទន្ទឹងរង់ចាំដំណើរទស្សនកិច្ចពីប្រធានាធិបតីរុស្ស៊ី លោក Vladimir Putin នៅចុងឆ្នាំនេះ។

អំឡុងកិច្ចប្រជុំរបស់លោក Doval ជាមួយលោក Sergei Shoigu លេខាធិការក្រុមប្រឹក្សាសន្តិសុខរុស្ស៊ី ភាគីទាំង២ បានសង្កត់ធ្ងន់លើសារៈសំខាន់នៃទំនាក់ទំនងរបស់ប្រទេសទាំង២។

ការដាក់ពន្ធបន្ថែម ២៥ភាគរយរបស់លោក Trump លើទំនិញពីឥណ្ឌា ដែលចូលជាធរមាននៅថ្ងៃទី២៨ ខែសីហា បង្ហាញពីការធ្លាក់ចុះយ៉ាងធ្ងន់ធ្ងរបំផុត នៅក្នុងទំនាក់ទំនង រវាងសហរដ្ឋអាមេរិក និងឥណ្ឌា ចាប់តាំងពីការវិលត្រលប់របស់លោកទៅកាន់អំណាចវិញ ក្នុងខែមករា ដោយគំរាមកំហែងរំខានដល់លទ្ធភាពចូលទៅកាន់ទីផ្សារនាំចេញដ៏ធំបំផុតរបស់ឥណ្ឌា។

នៅក្នុងសេចក្តីអធិប្បាយតាមទូរទស្សន៍ តំណាងរបស់រុស្ស៊ី គឺលោក Shoigu បានប្រាប់លោក Doval ថា៖ «យើងប្តេជ្ញាចិត្តចំពោះកិច្ចសហប្រតិបត្តិការសកម្មបន្ថែមទៀត ដើម្បីបង្កើតសណ្តាប់ធ្នាប់ពិភពលោកថ្មី យុត្តិធម៌ និងនិរន្តរភាព ធានាបាននូវឧត្តមភាពនៃច្បាប់អន្តរជាតិ និងរួមគ្នាប្រយុទ្ធប្រឆាំងនឹងបញ្ហាប្រឈម និងការគំរាមកំហែងនានា នាពេលបច្ចុប្បន្ន»៕