រដ្ឋបាលរបស់លោកប្រធានាធិបតី Donald Trump កាលពីថ្ងៃព្រហស្បតិ៍ (៧ សីហា) បានស្នើឱ្យតុលាការកំពូលសហរដ្ឋអាមេរិក ដកដីការបស់តុលាការជាន់ទាប ដែលបានរារាំងភ្នាក់ងាររដ្ឋាភិបាលអាមេរិក មិនឱ្យធ្វើការចាប់ខ្លួនពាក់ព័ន្ធនឹងជនអន្តោប្រវេសន៍នៅទីក្រុង Los Angeles ដោយផ្អែកលើយុទ្ធសាស្រ្ត ដែលអ្នករិះគន់ហៅថាជាការចាប់ខ្លួនបែបរើសអើងជាតិសាសន៍។

នៅក្នុងឯកសារបន្ទាន់មួយ ក្រសួងយុត្តិធម៌បានស្នើឱ្យតុលាការជាន់ខ្ពស់បញ្ឈប់ដីការបស់ចៅក្រម ដែលរារាំងជាបណ្តោះអាសន្នលើមន្រ្តីភ្នាក់ងារមិនឱ្យឃាត់ខ្លួន ឬឃុំខ្លួនមនុស្សដោយពុំមាន "ការសង្ស័យសមហេតុផល" ដែលថាពួកគេរស់នៅអាមេរិកដោយខុសច្បាប់ ដោយផ្អែកតែលើជាតិសាសន៍ពួកគេ ឬប្រសិនបើពួកគេនិយាយភាសាអេស្ប៉ាញ ឬភាសាអង់គ្លេសដែលមានតុងសំឡេងមិនច្បាស់។ ដីការបស់ចៅក្រមរូបនោះ បានអនុវត្តចំពោះយុត្តាធិការរបស់តុលាការជាន់ទាបលើផ្នែកភាគច្រើននៃរដ្ឋកាលីហ្វ័រនីញ៉ា ភាគខាងត្បូង។

លោក Trump មានការគាំទ្រពីសេតវិមាន លើការសន្យាថានឹងមានការនិរទេសចេញពីអាមេរិកកម្រិតកំណត់ត្រា។ ការឆ្មក់បង្រ្កាបអន្តោប្រវេសន៍របស់រដ្ឋបាលលោក រួមទាំងនៅទីក្រុង Los Angeles បានបង្កឱ្យមានការភ័យស្លន់ស្លោក្នុងសហគមន៍អន្តោប្រវេសន៍ ក៏ដូចជាការតវ៉ាហិង្សាដ៏រីករាលដាល ហើយបានទាក់ទាញបណ្ដឹងផ្លូវច្បាប់ ជុំវិញយុទ្ធសាស្ត្រដ៏កម្រោលរបស់ភ្នាក់ងារអនុវត្តច្បាប់សហព័ន្ធ។

បុគ្គលជនជាតិឡាទីនមួយក្រុម ដែលពាក់ព័ន្ធក្នុងការឆ្មក់បង្រ្កាបនោះ រួមទាំងពលរដ្ឋអាមេរិកជាច្រើនផងដែរ បានប្តឹងក្រុមមន្ត្រីរដ្ឋបាលនៅតុលាការសហព័ន្ធ Los Angeles កាលពីខែកក្កដា។ ចៅក្រមប្រចាំតំបន់អាមេរិក លោកស្រី Maame Frimpong បានគាំទ្របណ្ដឹងនោះ ដោយយល់ឃើញថា សកម្មភាពរបស់មន្ត្រីទំនងជាបំពានលើវិសោធនកម្មលើកទី៤ ហើយបានចេញដីកាបណ្ដោះអាសន្នបញ្ឈប់ភ្នាក់ងារមិនឱ្យឆ្មក់បង្រ្កាបចាប់ខ្លួននៅតំបន់នោះ៕