ប្រធានាធិបតីអាមេរិកលោក ដូណាល់ ត្រាំ (Donald Trump) បានអំពាវនាវឲ្យប្រទេសមជ្ឈិមបូព៌ាទាំងអស់ចូលរួមកិច្ចព្រមព្រៀង Abraham ដែលអំពាវនាវឲ្យមានទំនាក់ទំនងធម្មតាជាមួយអ៊ីស្រាអែលឡើង វិញ។

លោកបានសរសេរនៅលើកម្មវិធីប្រព័ន្ធផ្សព្វផ្សាយ Truth Social ថា៖«ឥឡូវនេះ ឃ្លាំងអាវុធនុយក្លេអ៊ែរដែលត្រូវបានបង្កើតឡើងដោយប្រទេសអ៊ីរ៉ង់ ត្រូវបានបំផ្លាញចោលទាំងស្រុង។ ការធ្វើបែបនេះ មានសារៈសំខាន់ខ្លាំងណាស់សម្រាប់ខ្ញុំ ដែលប្រទេសមជ្ឈិមបូព៌ាទាំងអស់ ចូលរួមកិច្ចព្រមព្រៀង Abraham ហើយនឹងធានាសន្តិភាពនៅមជ្ឈិមបូព៌ា»។

លោក ត្រាំ ចាត់ទុកកិច្ចព្រមព្រៀង Abraham គឺជាសមិទ្ធិផលដ៏សំខាន់មួយ ក្នុងអាណត្តិដំបូងរបស់លោក ជាប្រធានាធិបតី។ នៅឆ្នាំ ២០២០ អ៊ីស្រាអែល បានធ្វើប្រក្រតីភាពទំនាក់ទំនង ជាមួយបារ៉ែន អារ៉ាប់រួម និងម៉ារ៉ុក។ នៅឆ្នាំ ២០២១ ស៊ូដង់បានបង្កើតទំនាក់ទំនងការទូតជាមួយរដ្ឋជ្វីហ្វ។

មុនពេលមានកិច្ចព្រមព្រៀង Abraham អ៊ីស្រាអែលមានទំនាក់ទំនងការទូតតែជាមួយអេហ្ស៊ីបប៉ុណ្ណោះដែលបានបង្កើតឡើងក្នុងឆ្នាំ ១៩៧៩ និងហ្ស៊កដានី បង្កើតឡើងក្នុងឆ្នាំ ១៩៩៤ ក្នុងចំណោមរដ្ឋអារ៉ាប់។

បេសកជនពិសេសរបស់ប្រធានាធិបតីអាមេរិក លោក Steve Witkoff បានបញ្ជាក់កាលពីខែឧសភាថា ប្រទេសលីបង់ លីប៊ី អារ៉ាប៊ីសាអ៊ូឌីត និងស៊ីរី អាចចូលរួមក្នុងកិច្ចព្រមព្រៀង Abraham ក្នុងពេលឆាប់ៗនេះ។ នាពេលមុននេះ លោក ត្រាំ បាននិយាយថា អារ៉ាប៊ីសាអ៊ូឌីត អាចចុះហត្ថលេខាលើកិច្ចព្រមព្រៀងទាំងនេះ នៅចុងឆ្នាំ ២០២៥។