នាវាចម្បាំងជប៉ុន បានចូលចតនៅរដ្ឋធានីនៃប្រទេសនូវែលសេឡង់ នៅថ្ងៃសុក្រនេះ ជាលើកដំបូងក្នុង  រយៈពេលជិត ៩០ឆ្នាំ ចំពេលមានការខិតខំប្រឹងប្រែងរបស់ទីក្រុងតូក្យូ ដើម្បីបង្កើនទំនាក់ទំនងយុទ្ធសាស្ត្ររបស់ខ្លួន នៅក្នុងមហាសមុទ្រប៉ាស៊ីហ្វិកខាងត្បូង។

នាវាពិឃាតពីរគ្រឿង ដែលមាននាវិកជាង ៥០០នាក់ នៅលើនោះ បានបើកចូលទៅក្នុងកំពង់ផែវែលីងតោន (Wellington) អមដោយនាវាកងទ័ពជើងទឹកនូវែលសេឡង់ HMNZS Canterbury ។ នាវា JS Ise និងនាវាពិឃាត JS Suzunami កំពុងត្រូវបានដាក់ពង្រាយ នៅឥណ្ឌូប៉ាស៊ីហ្វិក ហើយបានមកដល់ពីទីក្រុងស៊ីដនី ជាទីដែលនៅក្នុងខែនេះ យោធារបស់ជប៉ុន បានចូលរួមសមយុទ្ធ ដែលពាក់ព័ន្ធនឹងនូវែលសេឡង់ អូស្ត្រាលី និងប្រទេសដទៃទៀត។

ដំណើរទស្សនកិច្ចនៅទីក្រុងវែលីងតោន គឺទស្សនកិច្ចផ្លូវការមួយ ប៉ុន្តែវាបានកើតឡើង នៅពេលដែលប្រទេសជប៉ុន ដែលជាសម្ព័ន្ធមិត្តសន្ធិសញ្ញាតែមួយគត់ គឺសហរដ្ឋអាមេរិក បានស្វែងរកកាន់តែខ្លាំងឡើងដើម្បីបង្កើនកិច្ចសហប្រតិបត្តិការយោធាទ្វេភាគី ចំពេលមានភាពតានតឹងក្នុងតំបន់ កំពុងបន្ត។

បេសកជនរបស់ប្រទេសជប៉ុនប្រចាំនៅទីក្រុងវែលីងតោន លោក Makoto Osawa បានថ្លែងប្រាប់អ្នកយកព័ត៌មាន នៅថ្ងៃសុក្រនេះថា៖«កម្លាំងការពាររបស់យើង កំពុងបង្កើនកិច្ចសហប្រតិបត្តិការ មិនត្រឹមតែជាមួយនូវែលសេឡង់ និងអូស្ត្រាលីប៉ុណ្ណោះទេ ថែមទាំងជាមួយប្រទេសកោះប៉ាស៊ីហ្វិកជាច្រើនផងដែរ»។ «គោលដៅចម្បងរបស់យើង គឺឥណ្ឌូប៉ាស៊ីហ្វិកសេរី និងបើកចំហ។

ការអត្ថាធិប្បាយរបស់លោកឯកអគ្គរដ្ឋទូត បានធ្វើឡើង បន្ទាប់ពីមានការប្រកាសកាលពីថ្ងៃអង្គារដោយរដ្ឋាភិបាលអូស្ត្រាលីថា ក្រុមហ៊ុនជប៉ុន Mitsubishi Heavy Industries បានឈ្នះការដេញថ្លៃសម្រាប់កិច្ចសន្យាសាងសង់នាវាចម្បាំងអូស្ត្រាលី ដោយបានឈ្នះក្រុមហ៊ុនអាល្លឺម៉ង់មួយ។ ខណៈពេលដែលមន្ត្រីនៅទីក្រុងកង់បេរ៉ា (Canberra) បាននិយាយថា សំណើរបស់ជប៉ុន គឺល្អបំផុត និងធូរថ្លៃបំផុត ពួកគេក៏បានសាទរផងដែរថា នេះគឺជាកិច្ចព្រមព្រៀងឧស្សាហកម្មការពារដ៏ធំបំផុតរវាងប្រទេសទាំងពីរ។