បុគ្គលពីក្រុមអ្នកចរចាពាណិជ្ជកម្មរបស់ទីក្រុងតូក្យូ បានប្រាប់ថា រដ្ឋាភិបាលសហរដ្ឋអាមេរិក កាលពីថ្ងៃព្រហស្បតិ៍ (ទី៧ ខែសីហា) បានសន្យាថា នឹងកែសម្រួលក្រឹត្យរបស់លោកប្រធានាធិបតី ដើម្បីដកចេញអត្រាពន្ធត្រួតគ្នា លើទំនិញរបស់ប្រទេសជប៉ុន បន្ទាប់ពីមានកិច្ចពិភាក្សា នៅទីក្រុងវ៉ាស៊ីនតោន ដើម្បីដោះស្រាយនូវអ្វីដែលលោកហៅថា ការធ្វេសប្រហែស «ដ៏គួរឲ្យសោកស្តាយ»។

ក្នុងអំឡុងពេលមានការពិភាក្សាទាំងនោះ លោក Ryosei Akazawa បានជំរុញឲ្យរដ្ឋមន្ត្រីពាណិជ្ជកម្មអាមេរិក លោក Howard Lutnick និងរដ្ឋមន្ត្រីក្រសួងរតនាគារ លោក Scott Bessent ផ្ដល់ការធានាថា កាតព្វកិច្ចពន្ធ ១៥ភាគរយដែលបានព្រមព្រៀងកាលពីខែមុន លើការនាំចូលរបស់ជប៉ុន នឹងមិនត្រូវបានបន្ថែមទៅលើទំនិញមួយចំនួន ដូចជាសាច់គោជាដើម ដែលត្រូវបង់ពន្ធខ្ពស់។

លោក Akazawa បានបញ្ជាក់ថា រដ្ឋមន្ត្រីទាំង២ បានពន្យល់ថា ពួកលោកនឹងកែសម្រួលក្រឹត្យរបស់លោក ប្រធានាធិបតី នៅថ្ងៃទី៣១ ខែកក្កដា ដែលរួមបញ្ចូលទាំងលក្ខខណ្ឌមិនបន្ថែម សម្រាប់សហភាពអឺរ៉ុប ប៉ុន្តែមិនមែនប្រទេសជប៉ុនឡើយ ហើយថែមទាំងសងត្រលប់វិញនូវការបង់លើសកាតព្វកិច្ចដែលប្រមូលបានផងដែរ។

ជាមួយគ្នានេះ លោក Lutnick និងលោក Bessent ក៏បាននិយាយផងដែរថា លោក Trump នឹងកាត់បន្ថយអត្រាពន្ធលើរថយន្តពី ២៧,៥ភាគរយ មក ១៥ភាគរយ នៅក្នុងក្រឹត្យមួយដាច់ដោយឡែក ដោយស្របតាមកិច្ចព្រមព្រៀងពាណិជ្ជកម្មដែលប្រទេសទាំង២ សម្រេចបានកាលពីខែមុន។

ទាំងក្រសួងរតនាគារ និងពាណិជ្ជកម្មអាមេរិក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងកិច្ចប្រជុំជាមួយលោក Akazawa៕