របាយការណ៍មួយបាននិយាយនៅថ្ងៃអាទិត្យ (១០ សីហា) នេះថា យោធាកូរ៉េខាងត្បូង បានធ្លាក់ចុះ ២០% យ៉ាងគំហុកក្នុងរយៈពេល ៦ឆ្នាំចុងក្រោយនេះ មកនៅត្រឹម ៤៥០.០០០នាក់ ដែលភាគច្រើនដោយសារតែការថយចុះយ៉ាងខ្លាំងនៃចំនួនប្រជាជនបុរស ដែលមានអាយុចូលបម្រើកាតព្វកិច្ចយោធា នៅក្នុងប្រទេសដែលមានអត្រាកំណើតទាបបំផុតរបស់ពិភពលោកមួយនេះ។

ក្រសួងការពារជាតិបាននិយាយក្នុងរបាយការណ៍ថា ការថយចុះយ៉ាងខ្លាំងនៃក្រុមបុរសដែលអាចរកបានសម្រាប់ការបម្រើយោធា ក៏បណ្តាលឱ្យមានការខ្វះខាតនៃចំនួនមន្រ្តីបែបនេះផងដែរ ហើយអាចបណ្តាលឱ្យមានការលំបាកក្នុងប្រតិបត្តិការ ប្រសិនបើបញ្ហានេះនៅតែបន្ត។

ទិន្នន័យរបស់រដ្ឋាភិបាលកូរ៉េខាងត្បូងបង្ហាញថា ក្នុងពេលចន្លោះឆ្នាំ២០១៩ និង២០២៥ ចំនួនប្រជាជនបុរសអាយុ ២០ឆ្នាំបានធ្លាក់ចុះ ៣០% មកនៅត្រឹម ២៣០.០០០នាក់ ដោយនេះជាក្រុមអាយុសម្រាប់បុរសភាគច្រើនដែលប្រឡងជាប់ចូលបម្រើយោធា ដែលបច្ចុប្បន្នមានរយៈពេលកាតព្វកិច្ច ១៨ខែ។

យោធាកូរ៉េខាងត្បូង បានធ្លាក់ចុះជាលំដាប់ចាប់តាំងពីដើមទសវត្សរ៍ឆ្នាំ២០០០មក នៅពេលទីក្រុងសេអ៊ូល មានទាហានប្រហែល ៦៩០.០០០នាក់។ ល្បឿននៃការថយចុះចំនួនទាហាន បានកើនឡើងខ្លាំងក្នុងអំឡុងចុងទសវត្សរ៍ឆ្នាំ២០១០ ហើយមានទាហាន និងមន្ត្រីសកម្មប្រហែល ៥៦៣.០០០នាក់ប៉ុណ្ណោះក្នុងឆ្នាំ២០១៩។

ចំណែកកូរ៉េខាងជើងវិញ ត្រូវបានគេជឿថាមានយោធាសកម្មយ៉ាងច្រើនប្រមាណ ១,២លាននាក់ នេះបើយោងតាមការប៉ាន់ប្រមាណចុងក្រោយដោយក្រសួងការពារជាតិកូរ៉េខាងត្បូង ក្នុងឆ្នាំ២០២២៕