ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃអាទិត្យ (១០ សីហា) ថា លោកនាយករដ្ឋមន្ត្រី Benjamin Netanyahu បានធ្វើកិច្ចសន្ទនាតាមទូរសព្ទជាមួយលោកប្រធានាធិបតីអាមេរិក Donald Trump អំពីផែនការវាយលុកថ្មីរបស់យោធាអ៊ីស្រាអែល ទៅលើតំបន់ហ្កាហ្សាប៉ាឡេស្ទីន។

ការិយាល័យរបស់លោក Netanyahu និយាយថា "មេដឹកនាំទាំងពីររូបបានពិភាក្សាពីផែនការរបស់អ៊ីស្រាអែល ក្នុងការគ្រប់គ្រងបន្ទាយនៅសេសសល់របស់ក្រុមហាម៉ាស ក្នុងតំបន់ហ្កាហ្សា ដើម្បីបញ្ចប់សង្រ្គាមដោយធានាការដោះលែងចំណាប់ថ្នូរ និងកម្ចាត់ក្រុមហាម៉ាស"។ ការិយាល័យនេះបន្តថា លោក Netanyahu ក៏បានថ្លែងអំណរគុណដល់លោកប្រធានាធិបតី Trump សម្រាប់ការគាំទ្រដ៏ខ្ជាប់ខ្ជួនរបស់លោកចំពោះអ៊ីស្រាអែល ចាប់តាំងពីការចាប់ផ្តើមនៃសង្រ្គាមមក។

ជំនួបតាមទូរសព្ទនេះធ្វើឡើងនៅពេលដែលលោក Netanyahu និយាយការពារផែនការរបស់អ៊ីស្រាអែល ក្នុងការបង្កើនវត្តមានយោធានៅក្នុងតំបន់ហ្កាហ្សា ជាមួយនឹងគោលដៅដែលបានចែងយ៉ាងច្បាស់ថា លុបបំបាត់បន្ទាយរបស់ក្រុមហាម៉ាស ដែលនៅសេសសល់ក្នុងទឹកដីប៉ាឡេស្ទីននេះ។

លោក Trump ហាក់ផ្តល់ការយល់ព្រមយ៉ាងម៉ឺងម៉ាត់ឱ្យលោក Netanyahu ក្នុងការកាន់កាប់តំបន់ហ្កាហ្សាស្ទ្រីប ទោះបីជាសម្ព័ន្ធមិត្តផ្សេងទៀតរបស់សហរដ្ឋអាមេរិក និងអ៊ីស្រាអែល បានរារាំងជំនួយយោធា និងថ្កោលទោសខ្លាំងៗលើរដ្ឋាភិបាលអ៊ីស្រាអែល ចំពោះវិបត្តិភាពអត់ឃ្លានដែលកំពុងកើនឡើងយ៉ាងមហន្តរាយនៅក្នុងតំបន់ហ្កាហ្សាក៏ដោយ៕