លោក Yaroslav Lissovolik សមាជិកក្រុមប្រឹក្សាកិច្ចការអន្តរជាតិរុស្ស៊ី បាននិយាយថា ប្រទេសទាំងពីរ អាចឈានដល់កម្រិតថ្មីប្រកបដោយគុណភាព បន្ទាប់ពីកិច្ចប្រជុំនាពេលខាងមុខរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន និងលោកប្រធានាធិបតីអាមេរិកលោក ដូណាល់ ត្រាំ (Donald Trump)។

អ្នកជំនាញរូបនេះ បានថ្លែងប្រាប់ទីភ្នាក់ងារសារព័ត៌មាន TASS នៅក្នុងបទសម្ភាសន៍មួយថា៖«សេចក្តីថ្លែងការណ៍ផ្លូវការ ត្រូវបានធ្វើឡើងរួចហើយទាក់ទងនឹងឱកាស និងការរំពឹងទុកដែលអាចបើកចំហសម្រាប់ប្រទេសទាំងពីរ បន្ទាប់ពីការដោះស្រាយបញ្ហាភូមិសាស្ត្រនយោបាយ ហើយនៅក្នុងបរិបទនេះ វាអាចត្រូវបានគេបកស្រាយថា ជាកម្រិតជាក់លាក់នៃអាកប្បកិរិយា និងឆន្ទៈ ក្នុងការដឹកនាំកិច្ចសន្ទនាក្នុងទិសដៅនេះ។ ខ្ញុំគិតថា យើងអាចរំពឹងថា ប្រសិនបើកិច្ចព្រមព្រៀងភូមិសាស្ត្រនយោបាយសំខាន់ៗ ត្រូវបានសម្រេច ភាគីទាំងពីរ អាចចាប់ផ្តើមការពិភាក្សាដ៏សំខាន់អំពីវិស័យនានាដែលមានសក្តានុពលក្នុងការ ស្តារឡើងវិញនូវកិច្ចសហប្រតិបត្តិការសេដ្ឋកិច្ចបានយ៉ាងឆាប់រហ័ស ដែលអាចដំណើរការល្អលើសពីអ្វីបានកើតឡើង រយៈពេល ៦-៧ឆ្នាំ កន្លងទៅនោះ»។

លោក Lissovolik បានលើកឡើងថា ការពិភាក្សាអំពីវិស័យសំខាន់ៗនៃកិច្ចសហប្រតិបត្តិការសេដ្ឋកិច្ច អាចរួមបញ្ចូលផ្នែកថ្មីៗមួយចំនួនទៀត។

លោកបានសន្និដ្ឋានថា៖«ជាគោលការណ៍ កិច្ចសហប្រតិបត្តិការដែលអាចធ្វើទៅបាន ត្រូវបានពិចារណារួចហើយ ក្នុងប៉ុន្មានខែថ្មីៗនេះ រួមទាំងក្នុងវិស័យឧស្សាហកម្ម វិស័យអវកាស និងអាចជាវិស័យហិរញ្ញវត្ថុផងដែរ។ ម្យ៉ាងវិញទៀត វាច្បាស់ណាស់ថា មានឥរិយាបថ និងឆន្ទៈជាក់លាក់ ក្នុងការពិចារណាលើវិស័យកិច្ចសហប្រតិបត្តិកា រដែលអាចធ្វើទៅបាន។ ទាំងអស់នេះ គឺអាស្រ័យលើថាតើកិច្ចព្រមព្រៀងជាមូលដ្ឋានស្តីពីបញ្ហាភូមិសាស្ត្រនយោបាយ ត្រូវបានអនុម័តយ៉ាងឆាប់រហ័ស និងកម្រិតណានោះ»។