ការិយាល័យនាយករដ្ឋមន្ត្រីបាននិយាយថា នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បានសន្ទនាតាមទូរស័ព្ទជាមួយប្រធានាធិបតីអាមេរិកលោក ដូណាល់ ត្រាំ (Donald Trump) ដែលផ្តោតលើផែនការរបស់អ៊ីស្រាអែលសម្រាប់ការបន្តប្រតិបត្តិការ នៅតំបន់ហ្កាហ្សាស្ទ្រីប។

ការិយាល័យនេះ បានឲ្យដឹងថា៖«លោកទាំងពីរ បានពិភាក្សាគ្នាអំពីផែនការរបស់អ៊ីស្រាអែលសម្រាប់ការដណ្តើមយកទីតាំងរឹងមាំរបស់ក្រុមហាម៉ាសដែលនៅសេសសល់នៅក្នុងតំបន់ហ្កាហ្សា ដើម្បីនាំមកនូវការបញ្ចប់សង្រ្គាម ការដោះលែងចំណាប់ថ្នូរ និងការកម្ចាត់ក្រុមហាម៉ាស។ លោកនាយករដ្ឋមន្ត្រី ណេតាន់យ៉ាហ៊ូ បានថ្លែងអំណរគុណដល់លោកប្រធានាធិបតី ត្រាំ សម្រាប់ការគាំទ្រយ៉ាងខ្ជាប់ខ្ជួនរបស់លោកចំពោះអ៊ីស្រាអែល ចាប់តាំងពីការចាប់ផ្តើមនៃសង្រ្គាមនេះ»។

កាលពីដើមសប្តាហ៍មុន គណៈរដ្ឋមន្ត្រីសង្គ្រាមរបស់អ៊ីស្រាអែល បានអនុម័តផែនការរបស់លោក ណេតាន់យ៉ាហ៊ូ ដើម្បីគ្រប់គ្រងទីក្រុងហ្កាហ្សា និងពង្រីកប្រតិបត្តិការនៅទូទាំងតំបន់។