ក្រុមអ្នកស៊ើបអង្កេតរបស់អង្គការសហប្រជាជាតិ (UN) បានបង្ហាញនៅថ្ងៃអង្គារ (ទី១២ ខែសីហា) នេះថា ពួកគេបានរកឃើញភស្តុតាងពីការធ្វើទារុណកម្មជាប្រព័ន្ធ ដោយកងកម្លាំងសន្តិសុខមីយ៉ាន់ម៉ា និងដឹងអត្តសញ្ញាណជនល្មើសជាន់ខ្ពស់មួយចំនួន។

យន្តការស៊ើបអង្កេតឯករាជ្យ សម្រាប់សហភាពមីយ៉ាន់ម៉ា (IIIM) ដែលត្រូវបានបង្កើតឡើងក្នុងឆ្នាំ២០១៨ ដើម្បីវិភាគភស្តុតាងនៃការរំលោភធ្ងន់ធ្ងរលើច្បាប់អន្តរជាតិ បានឲ្យដឹងថា ជនរងគ្រោះត្រូវរងការវាយដំ ឆក់ខ្សែភ្លើង ការច្របាច់ក និងទម្រង់នៃការធ្វើទារុណកម្មផ្សេងទៀត។

នៅក្នុងសេចក្តីថ្លែងការណ៍អមដោយរបាយការណ៍មាន ១៦ទំព័រ ប្រធានផ្នែកយន្តការ លោក Nicholas Koumjian បានឲ្យដឹងថា៖ «យើងបានរកឃើញភស្តុតាងសំខាន់ៗ ដោយរួមមានទាំងសក្ខីកម្មពីសាក្សីផងដែរ ដែលបង្ហាញពីការធ្វើទារុណកម្មជាប្រព័ន្ធ នៅកន្លែងឃុំឃាំងរបស់សហភាពមីយ៉ាន់ម៉ា»។

របាយការណ៍នោះបានរៀបរាប់ទៀតថា ការធ្វើទារុណកម្ម ជួនកាលបណ្តាលឲ្យស្លាប់ ដោយបន្ថែមថា កុមារដែលជារឿយៗត្រូវបានឃុំខ្លួនដោយខុសច្បាប់តំណាងឲ្យឪពុកម្តាយដែលបាត់ខ្លួនរបស់ពួកគេ ស្ថិតក្នុងចំណោមអ្នករងទារុណកម្មទាំងនោះ។ ហើយរបាយការណ៍បានបញ្ជាក់ថា រដ្ឋាភិបាលគាំទ្រដោយយោធា មិនបានឆ្លើយតបឡើយ ចំពោះសំណើជាង ២០លើកពីក្រុមរបស់ UN ដើម្បីសុំព័ត៌មាន អំពីឧក្រិដ្ឋកម្មដែលត្រូវបានចោទប្រកាន់នេះ និងសំណើចូលទៅកាន់ប្រទេសនេះ។

របបយោធា ប្រាប់ថា ខ្លួនមានកាតព្វកិច្ចធានាសន្តិភាព និងសន្តិសុខ។ របបនេះបានបដិសេធថា អំពើឃោរឃៅនានា មិនបានកើតមានឡើយ ហើយបានទម្លាក់កំហុសទៅលើ «ភេរវករ» ថា បានបង្កឲ្យមានភាពចលាចល។

គួរបញ្ជាក់ថា សហភាពមីយ៉ាន់ម៉ាបានស្ថិតក្នុងភាពវឹកវរ ចាប់តាំងពីមានរដ្ឋប្រហារយោធាឆ្នាំ២០២១ ប្រឆាំងនឹងរដ្ឋាភិបាលស៊ីវិលជាប់ឆ្នោត ជាអ្វីដែលបានធ្វើឲ្យប្រទេសនេះធ្លាក់ចូលទៅក្នុងសង្រ្គាមស៊ីវិលរហូតមកដល់ពេលនេះ៕