លោក Abdul Karim Abbas គឺជាអ្នកថែសួនស្ម័គ្រចិត្តមួយរូបនៅទីក្រុងបាកដាដ បានប្រើប្រាស់កន្លែងបណ្តុះកូនឈើក្នុងព្រះវិហាររបស់លោក ដើម្បីប្រយុទ្ធប្រឆាំងនឹងការគំរាមកំហែងខ្លាំងបំផុតនៅក្នុងប្រទេសអ៊ីរ៉ាក់ គឺវាលរហោដ្ឋាន ។

កាលពីរយៈពេល ៥ឆ្នាំមុន ក្រោយមើលឃើញមនុស្សម្នាចាកចេញពីទីក្រុងដើម្បីស្វែងរកខ្យល់អាកាសបរិសុទ្ធ លោក Abbas វ័យ ៦៤ឆ្នាំ បានចាប់ផ្តើមដាំដើមឈើនៅលើដំបូលផ្ទះរបស់លោក ហើយនិងចែកចាយដើមឈើទាំងអស់នេះដោយឥតគិតថ្លៃ ។ 

គម្រោងដ៏ដូចរបស់លោកបានប្រែក្លាយទៅជាកន្លែងបណ្តុះកូនឈើនៅក្នុងផ្ទះរបស់លោក ហើយក្រោយមកក្លាយជាកន្លែងបណ្តុះកូនឈើនៅក្នុងសួនច្បារព្រះវិហារ ជាទីដែលលោកចែកចាយកូនឈើរាប់ពាន់ដើម ដើម្បីធ្វើឲ្យទីក្រុងបាកដាដក្លាយជាទីក្រុងស្អាត ។

លោក Abbas និយាយថា ជាទូទៅលោកដើរប្រមូលគ្រាប់ពូជដែលជ្រុះពីដើមឈើនៅតាមទីសាធារណៈ ។ លោកប្រែក្លាយដើមឈើទាំងនេះនៅជាអុកហ្ស៊ីសែននៅតាមផ្លូវ ។ វាមិនខាតបង់អ្វីឡើយគ្រាន់តែដាំកូនឈើនៅតាមផ្លូវនោះ វាត្រូវការការប្តេជ្ញាចិត្ត និងឆន្ទៈមោះមុតមួយប៉ុណ្ណោះ ។ ពេលខ្លះលោកទិញគ្រាប់ពូជ លោកធ្វើការជាកម្មករ រកប្រាក់ជាកម្មករសំណង់ ដើម្បីទិញដើមឈើ កាត់មែកវា ផ្សព្វផ្សាយពីវា រួចចែកចាយវាដោយឥតគិតថ្លៃ ។

កន្លែងដាំកូនឈើរបស់លោក Abbas មានស្លាកសញ្ញាសរសេរជាអក្សរដៃថា “ត្រូវចាំថាពួកយើងគ្មានផែនដីជម្រើសផ្សេងនោះទេ ដូច្នេះហើយពួកយើងត្រូវតែអភិរក្សវា” ។

សូមបញ្ជាក់ថា អ៊ីរ៉ាក់ស្ថិតនៅក្នុងចំណោមប្រទេសចំនួន ៥ដែលងាយរងគ្រោះខ្លាំងបំផុតដោយសារបម្រែបម្រួលអាកាសធាតុនៅលើពិភពលោក ក្នុងនោះវាលរហោដ្ឋានបានធ្វើឲ្យប៉ះពាល់ដល់ដី ៣៩ភាគរយនៅក្នុងប្រទេសមួយនេះ ៕