លោកប្រធានាធិបតី Volodymyr Zelensky បាននិយាយថា អ៊ុយក្រែននឹងបដិសេធរាល់សំណើររបស់រុស្ស៊ី ក្នុងការបោះបង់តំបន់ Donbas ជាថ្នូរនឹងបទឈប់បាញ់ ដោយព្រមានថា តំបន់នោះ អាចប្រើជាមូលដ្ឋានដ៏រឹងមាំសម្រាប់ការវាយប្រហារនាពេលអនាគត។    

លោក Zelensky បាននិយាយនៅមុនជំនួបរវាងប្រធានាធិបតីអាមេរិកលោក Donald Trump និងសមភាគីរុស្ស៊ី លោក Vladimir Putin ក្នុងរដ្ឋ Alaska នៅថ្ងៃសុក្រសប្ដាហ៍នេះ។

លោក Trump បាននិយាយថាកិច្ចព្រមព្រៀងសន្តិភាពណាមួយនឹងពាក់ព័ន្ធការដោះដូរទឹកដីមួយចំនួន ហើយត្រូវបានគេជឿថាមួយក្នុងចំណោមការទាមទាររបស់លោក Putin គឺថាទីក្រុង Kyiv ត្រូវប្រគល់ផ្នែកមួយចំនួននៃតំបន់ Donbas ដែលអ៊ុយក្រែន នៅតែគ្រប់គ្រងនៅឡើយ។ 

ទន្ទឹមនឹងនេះដែរ កងទ័ពរុស្ស៊ី បានបន្តការវាយលុកនៅរដូវក្តៅរបស់ពួកគេ ដោយការវាយសម្រុកភ្លាមៗនៅជិតទីក្រុង Dobropillia ភាគខាងកើត និងវាយរុលទៅមុខចម្ងាយ ១០ គីឡូម៉ែត្រ ក្នុងរយៈពេលដ៏ខ្លី។  

មេដឹកនាំអ៊ុយក្រែនរូបនេះ បានទទួលស្គាល់ថា ការវាយរុលទៅមុខបានកើតឡើងនៅក្នុងទីតាំងជាច្រើន ប៉ុន្តែបាននិយាយថា ទីក្រុង Kyiv នឹងកម្ទេចអង្គភាពដែលពាក់ព័ន្ធក្នុងការវាយប្រហារឆាប់ៗនេះ។

ជាមួយគ្នានោះ ការប៉ះទង្គិចគ្នាយ៉ាងខ្លាំងបានផ្ទុះឡើង ខណៈកងកម្លាំងរុស្ស៊ី និងអ៊ុយក្រែនព្យាយាមដណ្ដើមកាន់កាប់ទីក្រុង Krasnoarmeysk ដែលត្រូវគេស្គាល់ផងដែរថា Pokrovsk ក្នុងតំបន់យុទ្ធសាស្ត្រ Donetsk៕