អតីតស្ត្រីទី១របស់ប្រទេសកូរ៉េខាងត្បូង លោកស្រី Kim Keon Hee ត្រូវបានចាប់ខ្លួន បន្ទាប់ពីតុលាការកាលពីល្ងាចថ្ងៃអង្គារ ទី១២ សីហា បានចេញដីកាចាប់ខ្លួនលោកស្រី បន្ទាប់ពីមានការចោទប្រកាន់ពីបទពុករលួយ ដែលលោកស្រីបានច្រានចោល។

លោកស្រី Kim គឺជាអតីតស្ត្រីទីមួយតែម្នាក់គត់របស់ប្រទេសកូរ៉េខាងត្បូងដែលត្រូវបានចាប់ខ្លួន ដោយរួមជាមួយស្វាមីលោកស្រី អតីតប្រធានាធិបតី លោក Yoon Suk Yeol នៅក្នុងពន្ធនាគារ ខណៈលោកប្រឈមនឹងការជម្រះក្តីបន្ទាប់ពីការបណ្តេញលោកចេញពីតំណែងកាលពីខែមេសា ជុំវិញបំណងដាក់ច្បាប់អាជ្ញាសឹកដែលបរាជ័យកាលពីខែធ្នូ កន្លងទៅ។ លោកស្រី Kim ស្លៀកសម្លៀកបំពាក់ពណ៌ខ្មៅ បានឱនគោរពនៅពេលទៅដល់តុលាការ ប៉ុន្តែមិនបានឆ្លើយសំណួររបស់អ្នកសារព័ត៌មាន ឬធ្វើសេចក្តីថ្លែងការណ៍ណាមួយទេ។ បន្ទាប់ពីសវនាការបានបញ្ចប់ លោកស្រីបានចាកចេញទៅរង់ចាំសេចក្តីសម្រេចនៅមណ្ឌលឃុំឃាំងក្នុងទីក្រុងសេអ៊ូល។

រដ្ឋអាជ្ញាពិសេសដែលត្រូវបានតែងតាំងកាលពីដើមខែមិថុនា បាននិយាយនៅក្នុងសារខ្លីមួយថា តុលាការបានចេញដីកាសម្រាប់ការឃុំខ្លួនលោកស្រី Kim។ លោកស្រី Kim ក៏ត្រូវបានចោទប្រកាន់ពីបទទទួលកាបូបម៉ាក Chanel ចំនួនពីរដែលរួមគ្នាមានតម្លៃ២០លានវ៉ុន និងខ្សែកពេជ្រមួយខ្សែពីក្រុមមួយជាសំណូកថ្នូរទៅនឹងផលប្រយោជន៍អាជីវកម្ម។ ការចោទប្រកាន់លើលោកស្រី ដែលត្រូវកាត់ទោសដាក់ពន្ធនាគាររាប់ឆ្នាំ មានរាប់ចាប់ពីការក្លែងបន្លំភាគហ៊ុន រហូតដល់ការស៊ីសំណូក និងការជ្រៀតជ្រែកដោយខុសច្បាប់ពាក់ព័ន្ធនឹងម្ចាស់អាជីវកម្ម ឥស្សរជនសាសនា និងឈ្មួញកណ្តាលដែលមានអំណាចនយោបាយ។

អ្នកនាំពាក្យនៃក្រុមរដ្ឋអាជ្ញាពិសេសបាននិយាយក្នុងសន្និសីទសារព័ត៌មានបន្ទាប់ពីសវនាការកាលពីថ្ងៃអង្គារថា រដ្ឋអាជ្ញាបានស្វែងរកចាប់ខ្លួនលោកស្រី Kim ដោយសារតែហានិភ័យនៃការបំផ្លាញភស្តុតាង និងការជ្រៀតជ្រែកក្នុងការស៊ើបអង្កេត។