យោងតាមមន្ត្រីសេតវិមាន បានឲ្យដឹងថា លោកប្រធានាធិបតី Donald Trump និងប្រធានាធិបតីរុស្ស៊ី លោក Vladimir Putin ត្រូវបានគេរំពឹងថា នឹងរៀបចំកិច្ចប្រជុំកំពូលដែលមានការទន្ទឹងរង់ចាំជាយូរមកហើយ សម្រាប់មេដឹកនាំទាំង២ នៅឯមូលដ្ឋានយោធាសហរដ្ឋអាមេរិក ក្នុងទីក្រុង Anchorage រដ្ឋ Alaska នាថ្ងៃសុក្រចុងសប្ដាហ៍នេះ។

កិច្ចប្រជុំនៅឯមូលដ្ឋានយោធារួម Joint Base Elmendorf-Richardson នឹងក្លាយជាការជួបគ្នាលើកដំបូងរបស់មេដឹកនាំកំពូលទាំង២ អំឡុងអាណត្តិទី២ របស់លោក Trump ខណៈដែលម្ចាស់កៅអីសេតវិមានប្រឹងប្រែងបញ្ចប់សង្រ្គាមរបស់រុស្ស៊ី នៅអ៊ុយក្រែន។ ប្រព័ន្ធផ្សព្វផ្សាយ CNN បានរាយការណ៍ជាលើកដំបូង អំពីទីតាំងនៃកិច្ចប្រជុំនេះ ដែលប្រជាជនរុស្ស៊ីបានពោលសរសើរអំពីសារៈសំខាន់ជាប្រវត្តិសាស្ត្ររបស់ទីតាំងក្នុងរដ្ឋ ដែលសហរដ្ឋអាមេរិកបានទិញពីចក្រភពរុស្ស៊ី កាលពី ១៥៨ឆ្នាំមុន។

កាលពីថ្ងៃអង្គារ (ទី១២ ខែសីហា) រដ្ឋមន្ត្រីក្រសួងការបរទេស លោក Marco Rubio បានពណ៌នាកិច្ចប្រជុំកំពូលនាពេលខាងមុខថា ជា «កិច្ចប្រជុំបញ្ចេញអារម្មណ៍» ដោយនិយាយថា នោះមិនមែនជា «ការធ្វើសម្បទាន» ចំពោះលោក Putin ឡើយ។ ហើយលោកបានបន្ថែមថា៖ «យើងនឹងដឹងយ៉ាងលឿននៅក្នុងកិច្ចប្រជុំនោះថា តើមានឱកាសអ្វីនាំឲ្យជោគជ័យដែរ ឬអត់»។

កាលពីថ្ងៃចន្ទ លោក Trump បាននិយាយថា ប្រធានាធិបតីអ៊ុយក្រែន លោក Volodymyr Zelenskyy «មិនមែនជាផ្នែកនៃកិច្ចប្រជុំនេះទេ» នៅពេលដែលលោកត្រូវបានសួរថា តើ Zelenskyy ត្រូវបានអញ្ជើញឲ្យចូលរួមដែរ ឬអត់។ មេដឹកនាំអាមេរិកបានបញ្ជាក់ថា៖ «ខ្ញុំនឹងនិយាយថា គាត់ (លោក Zelenskyy) អាចទៅបាន ប៉ុន្តែគាត់បានទៅកិច្ចប្រជុំច្រើនហើយ។ អ្នកដឹងទេថា គាត់មានកិច្ចប្រជុំ ៣ឆ្នាំកន្លះហើយ តែគ្មានអ្វីកើតឡើងឡើយ»។

លោក Zelenskyy និងមន្ត្រីអ៊ុយក្រែនបានលើកឡើងម្តងហើយម្តងទៀតថា ពួកគេនឹងមិនព្រមបាត់បង់ទឹកដីដែលរុស្ស៊ីបញ្ចូលជាដែនដីឧបសម្ព័ន្ធដោយខុសច្បាប់នោះឡើយ ខណៈដែលលោក Trump បាននិយាយកាលពីសប្តាហ៍មុនថា អ៊ុយក្រែន និងរុស្ស៊ី ទំនងជានឹង «ដោះដូរ» ដែនដីដែលជាផ្នែកនៃកិច្ចព្រមព្រៀង ដើម្បីបញ្ចប់សង្រ្គាម៕