បន្ទាប់ពីការព្រមានរបស់អង្គការសហប្រជាជាតិថា អសន្តិសុខស្បៀងអាហារនៅក្នុងប្រទេសយេម៉ែន បានឈានដល់កម្រិត «មហន្តរាយ» រដ្ឋាភិបាលរបស់ប្រទេសនេះ បានប្រាប់ក្រុមប្រឹក្សាសន្តិសុខថា ខ្លួនកំពុងឈានទៅដល់ការដួលរលំនៃសេដ្ឋកិច្ច ហើយត្រូវការជំនួយជាបន្ទាន់ពីអន្តរជាតិ ដើម្បីបញ្ចៀសគ្រោះមហន្តរាយមនុស្សធម៌បន្ថែមទៀត។

ទីភ្នាក់ងារសារព័ត៌មានរដ្ឋ SABA បានរាយការណ៍កាលពីថ្ងៃអង្គារថា បេសកជនអង្គការសហប្រជាជាតិប្រចាំប្រទេសយេម៉ែនលោក Abdullah Al-Saadi បាននិយាយថា ការបាត់បង់ប្រាក់ចំណូលពីប្រេង ដែលធ្លាប់បង្កើតបាន ៧០% នៃប្រាក់ចំណូលសាធារណៈ បានធ្វើឲ្យប៉ះពាល់ដល់សេវាកម្មរដ្ឋ និងធ្វើឲ្យ ស្ថានភាពរស់ នៅកាន់តែអាក្រក់ឡើងសម្រាប់រាប់លាននាក់ ដែលកំពុងតស៊ូទប់ទល់ជាមួយភាពស្រេកឃ្លាន និងការផ្លាស់ទីលំនៅ។

អង្គការសហប្រជាជាតិ បាននិយាយថា ជិតពាក់កណ្តាលនៃកុមារអាយុក្រោម ៥ឆ្នាំ របស់ប្រទេសយេម៉ែនទទួលរងនូវកង្វះអាហារូបត្ថម្ភធ្ងន់ធ្ងរ ដោយមនុស្សជាច្រើន បានស្លាប់នៅក្នុងជំរំភៀសខ្លួនរួចហើយ។ រដ្ឋាភិបាល បានព្រមានថា វិបត្តិសេដ្ឋកិច្ចដែលរួមផ្សំដោយជម្លោះ ការប្រែប្រួលអាកាសធាតុ និងការថយចុះនៃជំនួយ កំពុងជំរុញមនុស្សកាន់តែច្រើនឈានទៅរកគ្រោះទុរភិក្ស និងធ្វើឲ្យធ្លាក់ចុះនូវការរំពឹងទុកសម្រាប់ការស្តារឡើងវិញ។