ទូរទស្សន៍ Al Arabiya បានរាយការណ៍ដោយដកស្រង់ប្រភពរបស់ខ្លួនថា ក្រុមហាម៉ាស បាននិយាយថា ខ្លួនត្រៀមជាស្រេចក្នុងការដកកងកម្លាំងរបស់ខ្លួនចេញពីតំបន់ហ្កាហ្សាស្ទ្រីប ប្រសិនបើអ៊ីស្រាអែល ដកកងទ័ពរបស់ខ្លួន ទៅកាន់កន្លែងដែលបានព្រមព្រៀងគ្នានោះ។

យោងតាមប្រភពព័ត៌មាន គណៈប្រតិភូហាម៉ាសនៅទីក្រុងគែរ បានប្រគល់សំណើរបស់ខ្លួនស្តីពីកិច្ចព្រមព្រៀងបទឈប់បាញ់នៅតំបន់ហ្កាហ្សាដ៏មានសក្តានុពល ដល់ក្រុមអ្នកសម្រុះសម្រួលអេហ្ស៊ីប។ ប្រភពដដែលបាននិយាយថា៖«ក្រុមហាម៉ាសបានបង្ហាញពីការត្រៀមខ្លួន ដើម្បីដកកងកម្លាំងរបស់ខ្លួន ជាថ្នូរនឹងការដកទ័ពរបស់អ៊ីស្រាអែល ទៅកាន់មូលដ្ឋានដែលបានព្រមព្រៀងគ្នា ហើយបានបញ្ជាក់ឡើងវិញនូវការប្តេជ្ញាចិត្តរបស់ខ្លួន ក្នុងការរក្សាអាយុជីវិតចំណាប់ថ្នូរទាំងអស់ ដោយបន្ថែមថា ក្រុមហាម៉ាស «ទាមទារកិច្ចព្រមព្រៀងជាលាយលក្ខណ៍អក្សរ ជាមួយអ៊ីស្រាអែល» ដែលនឹងផ្តល់ការធានាពីអន្តរជាតិថា អ៊ីស្រាអែលនឹងទម្លាក់ផែនការកាន់កាប់តំបន់ហ្កាហ្សារបស់ខ្លួន ហើយនឹងមិនបន្តកើតមានអរិភាពឡើងវិញទេ។

ប្រភពក៏បាននិយាយថា អេហ្ស៊ីបកំពុងធ្វើការលើផែនទីបង្ហាញផ្លូវសម្រាប់កិច្ចព្រមព្រៀងគ្រប់ជ្រុងជ្រោយស្តីពីតំបន់ហ្កាហ្សាដែលនឹងត្រូវអនុវត្ត នៅចុងខែសីហា។

ទូរទស្សន៍ Al-Qahera al-Ekhbariya របស់ប្រទេសអេហ្ស៊ីប បានរាយការណ៍កាលពីថ្ងៃពុធ ដោយដកស្រង់ប្រភពមួយថា គណៈប្រតិភូហាម៉ាស បានជួបប្រជុំគ្នានៅទីក្រុងគែរ ជាមួយប្រធានចារកម្មអេហ្ស៊ីប លោក Hassan Rashind ដើម្បីបង្ហាញអំពីចេតនារបស់ខ្លួន ក្នុងការបន្តកិច្ចចរចាបទឈប់បាញ់ឲ្យបានឆាប់តាម ដែលអាចធ្វើទៅបាន។ យោងតាមប្រភពបានឲ្យដឹងថា ការពិគ្រោះយោបល់នៅទីក្រុងគែរ កំពុងផ្តោតលើមធ្យោបាយ ដើម្បីឈានដល់កិច្ចព្រមព្រៀងបទឈប់បាញ់រយៈពេល ៦០ថ្ងៃ។