ប្រទេសប៉ាគីស្ថាន បានប្រកាសថាខ្លួននឹងបង្កើតកងកម្លាំងថ្មីនៅក្នុងជួរយោធា ដើម្បីត្រួតពិនិត្យសមត្ថភាពប្រយុទ្ធមីស៊ីល នៅក្នុងជម្លោះធម្មតា ដែលជាជំហានជាក់ស្តែងមួយដើម្បីផ្គូផ្គងកម្លាំងរបស់ខ្លួនឱ្យស្មើឥណ្ឌា ដែលជាប្រទេសជិតខាង និងជាគូប្រជែងដ៏ខ្លាំងក្លា។

លោកនាយករដ្ឋមន្ត្រីប៉ាគីស្ថាន Shehbaz Sharif បានប្រកាសពីការបង្កើតកងកម្លាំងរ៉ូកែតថ្មីរបស់កងទ័ពនេះ កាលពីល្ងាចថ្ងៃពុធ (១៣ សីហា) នៅក្នុងពិធីមួយដែលបានធ្វើឡើងនៅក្នុងទីក្រុងអ៊ីស្លាម៉ាបាដ ដើម្បីរំលឹកដល់ជម្លោះដ៏អាក្រក់បំផុតក្នុងរយៈពេលជាច្រើនទសវត្សរ៍ជាមួយប្រទេសឥណ្ឌា កាលពីខែឧសភា។ ពិធីនេះត្រូវបានធ្វើឡើងរយៈពេលមួយថ្ងៃមុនទិវាបុណ្យឯករាជ្យលើកទី៧៨ របស់ប៉ាគីស្ថាន។

នៅក្នុងសេចក្តីថ្លែងការណ៍មួយពីការិយាល័យនាយករដ្ឋមន្រ្តី លោក Sharif បាននិយាយថា "កងកម្លាំងថ្មីនឹងត្រូវបំពាក់ដោយបច្ចេកវិទ្យាទំនើបៗ" ដោយបន្ថែមថា កងកម្លាំងនេះនឹងបង្ហាញឱ្យឃើញនូវចំណុចដ៏សំខាន់មួយក្នុងការពង្រឹងសមត្ថភាពប្រយុទ្ធរបស់កងទ័ពប៉ាគីស្ថាន។ ប៉ុន្តែលោកមិនបានផ្តល់ព័ត៌មានលម្អិតបន្ថែមអ្វីទេ។

ទោះជាយ៉ាងនេះក្តី មន្ត្រីសន្តិសុខជាន់ខ្ពស់មួយរូបបាននិយាយថា កងកម្លាំងមីស៊ីលថ្មីនេះនឹងមានបញ្ជាការផ្ទាល់របស់ខ្លួនក្នុងវិស័យយោធា ដែលនឹងចាត់ចែង និងដាក់ពង្រាយមីស៊ីល នៅក្នុងព្រឹត្តិការណ៍ណាមួយនៃសង្រ្គាមធម្មតា៕