សារព័ត៌មាន Sky News បានរាយការណ៍ដោយដកស្រង់សម្តីរបស់រដ្ឋាភិបាលចក្រភពអង់គ្លេសថា ប្រធានាធិបតីអ៊ុយក្រែន លោក Volodymyr Zelenskiy នឹងជួបជាមួយនាយករដ្ឋមន្ត្រីអង់គ្លេស លោក Keir Starmer នៅវិមាន Downing Street នាថ្ងៃព្រហស្បតិ៍ (១៤ សីហា) នេះ។

ជំនួបនៅវិមាននាយករដ្ឋមន្រ្តីអង់គ្លេសនេះនឹងក្លាយជាការជំរុញចុងក្រោយបំផុតសម្រាប់ការទាមទាររបស់អឺរ៉ុប មុនពេលលោកប្រធានាធីបតីអាមេរិក Donald Trump បើកជំនួបកំពូលជាមួយសមភាគីរុស្ស៊ី លោក Vladimir Putin នៅថ្ងៃសុក្រស្អែកនេះ ក្នុងរដ្ឋអាឡាស្កា ដើម្បីពិភាក្សាពីការបញ្ចប់សង្គ្រាមនៅអ៊ុយក្រែន។

លោក Zelenskiy និងនិងមេដឹកនាំអឺរ៉ុបផ្សេងទៀត ដែលមិនចូលរួមក្នុងកិច្ចប្រជុំកំពូលនៅអាឡាស្កានោះ បានធ្វើជំនួបតាមទូរសព្ទរួមគ្នាមួយជាមួយលោក Trump កាលពីថ្ងៃពុធ ដោយបញ្ជាក់ជំហររបស់ពួកគេឡើងវិញ ហើយក្នុងពេលនោះ លោក Starmer បាននិយាយថា "បូរណភាពទឹកដី" របស់អ៊ុយក្រែន ត្រូវតែត្រូវបានការពារ ហើយព្រំដែនអន្តរជាតិ "មិនត្រូវផ្លាស់ប្តូរដោយប្រើកម្លាំង" នោះឡើយ។

កាលពីសប្តាហ៍មុនលោក Trump បានព្រមានថា អាចមាន "ការដោះដូរទឹកដីខ្លះ ដើម្បីអាចមានសន្តិភាពសម្រាប់ទាំងពីរ" ដែលនាំឱ្យមានការភ័យខ្លាចថា អ៊ុយក្រែន អាចនឹងត្រូវបោះបង់ចោលតំបន់មួយចំនួន ដើម្បីបញ្ចប់ជម្លោះដ៏បង្ហូរឈាមមួយនេះ។ អ៊ុយក្រែនបានទទូចថា ខ្លួននឹងមិនទទួលយកការគ្រប់គ្រងរបស់រុស្ស៊ី លើទឹកដីដែលខ្លួនរឹបអូសទៅនោះទេ រួមទាំងតំបន់គ្រីម៉េផងដែរ ខណៈទីក្រុងមូស្គូ ចង់រក្សាការគ្រប់គ្រងពេញលេញលើតំបន់ទាំងនោះ៕