នាយករដ្ឋមន្ត្រីប៉ូឡូញ លោក Donald Tusk បាននិយាយកាលពីថ្ងៃពុធ (១៣ សីហា) ថា រុស្ស៊ី ចង់បញ្ចូលប្រធានបទនៃការកាត់បន្ថយវត្តមានកងទ័ពណាតូ ទៅក្នុងកិច្ចសន្ទនាណាមួយស្ដីពីអនាគតរបស់អ៊ុយក្រែន ខណៈជំនួបកំពូលរវាងមេដឹកនាំសហរដ្ឋអាមេរិក-រុស្ស៊ី នៅរដ្ឋអាឡាស្កា ខិតកាន់តែជិត។

ថ្លែងប្រាប់អ្នកយកព័ត៌មាន លោក Tusk បាននិយាយថា "គ្រប់បានឮអស់ជាច្រើនថ្ងៃកន្លងមកនេះថា រុស្ស៊ីចង់ដាក់បញ្ចូលប្រធានបទកាត់បន្ថយវត្តមានទ័ពរបស់អង្គការណាតូ ជាឧទាហរណ៍នៅក្នុងប្រទេសប៉ូឡូញជាដើម ដាក់ទៅក្នុងកិច្ចសន្ទនាណាមួយដែលទាក់ទងនឹងអនាគតអ៊ុយក្រែន"។ លោកក៏បានសង្កត់ធ្ងន់ពីសារៈសំខាន់នៃសម្ព័ន្ធភាពអន្តរជាតិដ៏រឹងមាំលើបញ្ហានេះ។

អនុរដ្ឋមន្ត្រីក្រសួងការពារជាតិប៉ូឡូញ បាននិយាយថា ប៉ូឡូញរំពឹងថានឹងក្លាយជាប្រទេសចុងក្រោយគេនៅអឺរ៉ុប ដែលអាមេរិកនឹងដកទ័ពរបស់ខ្លួនចេញ ខណៈទីក្រុងវ៉ាស៊ីនតោន គិតចង់កាត់បន្ថយវត្តមានយោធាអាមេរិក នៅទូទាំងទ្វីប។

កន្លងមក វិមានក្រឹមឡាំងបានបដិសេធរបាយការណ៍នានា ដែលថាក្រុមមន្ត្រីរុស្ស៊ី បានស្នើឱ្យអាមេរិក ដកទ័ពរបស់អង្គការណាតូ ចេញពីប្រទេសនៅជិត ឬជាប់ព្រំដែនរុស្ស៊ី។ គួរឱ្យដឹងថា រុស្ស៊ីតែងខឹងសម្បារជាសាធារណៈ ឬស្ងាត់ៗ អស់ជាច្រើនឆ្នាំមកហើយពីវត្តមានកងទ័ពណាតូ ក្នុងប្រទេសជាំច្រើនដូចជារដ្ឋបាល់ទិកទាំងបី និងប៉ូឡូញ ជាដើម ហើយក៏បានត្អូញត្អែរយ៉ាងខ្លាំងពីទីតាំងខែលការពារមីស៊ីលរបស់ណាតូនៅប៉ូឡូញ និងរូម៉ានី៕