ប្រទេសអាល្លឺម៉ង់ បានប្រកាសកាលពីថ្ងៃពុធ (១៣ សីហា) ថា ខ្លួននឹងធ្វើការជាមួយក្រុមអ្នកគាំទ្រលោកខាងលិចជាច្រើនទៀតរបស់អ៊ុយក្រែន ដើម្បីផ្គត់ផ្គង់កញ្ចប់ជំនួយយោធាធំៗដល់ប្រទេសដែលរងគ្រោះដោយសង្រ្គាមមួយនេះ មានតម្លៃរហូតដល់ ៥០០លានដុល្លារ ដោយប្រើខ្សែបណ្ដាញផ្គត់ផ្គង់ថ្មីរបស់សម្ព័ន្ធយោធាណាតូ។

កាលពីដើមខែនេះ អង្គការណាតូ បានចាប់ផ្តើមសម្របសម្រួលការចែកចាយកញ្ចប់សព្វាវុធធំៗជាទៀងទាត់ទៅកាន់អ៊ុយក្រែន បន្ទាប់ពីហូឡង់ និយាយថាខ្លួននឹងផ្តល់យុទ្ធោបករណ៍ការពារដែនអាកាស គ្រាប់រំសេវ និងជំនួយយោធាផ្សេងទៀតក្នុងតម្លៃ ៥០០លានអឺរ៉ូ (ឬ ៥៨២លានដុល្លារ) ទៅកាន់ទីក្រុងគីវ។

ក្រោយមក ស៊ុយអែតក៏បានប្រកាសថាខ្លួននឹងបរិច្ចាគ ២៧៥លានដុល្លារ ដល់កិច្ចខិតខំប្រឹងប្រែងរួមគ្នានេះ ជាមួយប្រទេសជិតខាងអឺរ៉ុបខាងជើងរបស់ខ្លួន ដាណឺម៉ាក និងន័រវេស ដើម្បីផ្តល់កញ្ចប់ ៥០០លានដុល្លារ សម្រាប់ប្រព័ន្ធការពារដែនអាកាស អាវុធប្រឆាំងរថក្រោះ គ្រាប់រំសេវ និងគ្រឿងបន្លាស់ជាដើម។

ក្រសួងការបរទេស និងការពារជាតិរបស់អាល្លឺម៉ង់ និយាយថា ការគាំទ្រថ្មីនេះគឺផ្តោតលើយុទ្ធោករណ៍ដូចជា “សមត្ថភាពការពារដែនអាកាសដ៏សំខាន់ ដែលទាំងនេះគឺជាភាពចាំបាច់បន្ទាន់ ដើម្បីការពារប្រឆាំងនឹងការវាយប្រហារតាមអាកាសកំពុងបន្តរបស់រុស្ស៊ី ដែលកំពុងសម្លាប់ជនស៊ីវិលកាន់តែច្រើនឡើងនៅទូទាំងអ៊ុយក្រែន"៕