ក្រសួងការបរទេសស៊ូដង់ខាងត្បូង កាលពីថ្ងៃពុធ (ទី១៣ ខែសីហា) បានឲ្យដឹងថា ប្រទេសស៊ូដង់ខាងត្បូង មិនបានធ្វើការពិភាក្សាជាមួយអ៊ីស្រាអែល ដើម្បីតាំងទីលំនៅថ្មីរបស់ប្រជាជនប៉ាឡេស្ទីនពីតំបន់ហ្កាហ្សាដែលហែកហួរដោយសង្រ្គាមនោះឡើយ។

កាលពីថ្ងៃអង្គារ ដោយដកស្រង់សម្តីពីមនុស្ស ៦នាក់ដែលដឹងអំពីបញ្ហានេះ បណ្ដាញសារព័ត៌មានបានរាយការណ៍ថា អ៊ីស្រាអែលកំពុងពិភាក្សាជាមួយទីក្រុង Juba ដើម្បីតាំងទីលំនៅថ្មីដល់ជនជាតិប៉ាឡេស្ទីនទៅពីតំបន់ហ្កាហ្សា នៅក្នុងប្រទេសអាហ្វ្រិកខាងកើតមួយនេះ។

តែក្រសួងការបរទេសស៊ូដង់ខាងត្បូង បានបញ្ជាក់ឲ្យដឹងនៅក្នុងសេចក្តីថ្លែងការណ៍មួយថា៖ «ការអះអាងទាំងនេះគ្មានមូលដ្ឋានឡើយ ហើយក៏មិនឆ្លុះបញ្ចាំងពីជំហរផ្លូវការ ឬគោលនយោបាយរបស់រដ្ឋាភិបាលនៃសាធារណរដ្ឋស៊ូដង់ខាងត្បូងនោះដែរ»។

ក្នុងរយៈពេលប៉ុន្មានថ្ងៃថ្មីៗនេះ យោធារបស់អ៊ីស្រាអែលបានវាយលុកកាន់តែខ្លាំងឡើងៗលើទីក្រុងហ្កាហ្សា នៅមុនផែនការដណ្តើមកាន់កាប់ដែនដីរងការបំផ្លិចបំផ្លាញមួយនេះ ដែលជាជម្រករបស់ជនជាតិប៉ាឡេស្ទីនជាង ២លាននាក់។

មេដឹកនាំពិភពលោកជាច្រើនបង្ហាញនូវអារម្មណ៍មានក្ដីបារម្ភខ្លាំង ចំពោះគំនិតនៃការផ្លាស់ទីលំនៅប្រជាជន នៅតំបន់ហ្កាហ្សា ដែលប្រជាជនប៉ាឡេស្ទីនប្រាប់ថា នឹងដូចទៅនឹង «គ្រោះមហន្តរាយ» កាលពីពេលដែលមនុស្សរាប់សែននាក់បានភៀសខ្លួន ឬត្រូវបានបង្ខំឲ្យចាកចេញ ក្នុងអំឡុងពេលសង្គ្រាមអារ៉ាប់-អ៊ីស្រាអែលឆ្នាំ១៩៤៨។

កាលពីខែមីនា សូម៉ាលី និងតំបន់ផ្ដាច់ខ្លួនរបស់ប្រទេសនេះ គឺសូម៉ាលីឡែន ក៏បានបដិសេធផងដែរមិនទទួលសំណើណាមួយ ក្នុងការតាំងទីលំនៅថ្មីរបស់ប៉ាឡេស្ទីនទៅពីតំបន់ហ្កាហ្សា ដោយទីក្រុង Mogadishu បានបញ្ជាក់ថា ខ្លួនបានច្រានចោលរាល់វិធានការបែបនេះ៕