មន្ត្រីម្នាក់នៅថ្ងៃព្រហស្បតិ៍ (ទី១៤ ខែសីហា) នេះ បានប្រាប់ឲ្យដឹងថា ក្រុមសកម្មប្រយុទ្ធ នៅភាគពាយព្យនៃប្រទេសប៉ាគីស្ថាន បានធ្វើការវាយប្រហារពេញមួយយប់ដោយកាំភ្លើង និងគ្រាប់បែកដៃលើគោលដៅចំនួន ៨ ដោយបានសម្លាប់មន្ត្រីនគរបាលចំនួន ៦រូប។ 

មន្ត្រីនគរបាល លោក Mohammad Ali Babakhel បាននិយាយថា ការវាយប្រហារ បានដាក់គោលដៅលើប៉ុស្តិ៍នគរបាល ត្រួតពិនិត្យ និងល្បាត នៅទូទាំងតំបន់ចំនួន ៧ ក្នុងខេត្ត Khyber Pakhtunkhwa ជាប់ព្រំដែនប្រទេសអាហ្វហ្គានីស្ថាន ខណៈដែលប្រទេសមានប្រជាជនចំនួន ២៤០លាននាក់ បានប្រារព្ធបុណ្យឯករាជ្យលើកទី៧៨ របស់ខ្លួន។

លោកបានបញ្ជាក់ថា ពួកសកម្មប្រយុទ្ធបានប្រើប្រាស់បេ នៅក្នុងការវាយប្រហារខ្លះ ដោយបានបន្ថែមថា មន្ត្រីចំនួន ៦នាក់ ត្រូវបានសម្លាប់ ហើយ ៩នាក់ផ្សេងទៀត បានរងរបួស។ ការកើនឡើងនូវការវាយប្រហារក្នុងរយៈពេលប៉ុន្មានខែថ្មីៗនេះ គឺជាបញ្ហាប្រឈមពិបាកដោះស្រាយ សម្រាប់កងកម្លាំងនគរបាលដែលមានបុគ្គលិក និងបរិក្ខារមិនគ្រប់គ្រាន់ ដែលជាកម្លាំងជួរមុខទប់ទល់នឹងការវាយប្រហាររបស់ពួកសកម្មប្រយុទ្ធ។

ក្រុម Tehreek-e-Taliban Pakistan (TTP) ជាក្រុមសកម្មប្រយុទ្ធប៉ាគីស្ថានដែលមានទំនាក់ទំនងជាមួយក្រុមតាលីបង់អាហ្វហ្គានីស្ថាន បានចេញមកអះអាងទទួលខុសត្រូវ ចំពោះការវាយប្រហារនេះ៕