មនុស្សយ៉ាងហោចណាស់ ៣២នាក់ រួមទាំងអ្នកស្វែងរកជំនួយ ១៣ នាក់ត្រូវបានសម្លាប់កាលពីថ្ងៃព្រហស្បតិ៍ក្នុងការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សា នេះបើយោងតាមអាជ្ញាធរសុខាភិបាលប៉ាឡេស្ទីន ខណៈមនុស្ស ៤ នាក់ទៀតបានស្លាប់ដោយសារកង្វះអាហារូបត្ថស្របពេលមានវិបត្តិភាពអត់ឃ្លានកំពុងកើនឡើងនៅក្នុងដែនដីដែលត្រូវបានឡោមព័ទ្ធមួយនេះ។   

ក្រុមអាជ្ញាធរសុខាភិបាលក្នុងតំបន់និយាយថា កងកម្លាំងអ៊ីស្រាអែលបានបំផ្លាញផ្ទះសម្បែងជាច្រើនខ្នងក្នុងទីក្រុងហ្កាហ្សាភាគខាងកើតទាំងយប់ដោយបានសម្លាប់មនុស្ស១១នាក់ ក្នុងការវាយប្រហារតាមអាកាស និងរថក្រោះ  ខណៈក្រុមហាម៉ាស បានប្រាប់ក្រុមអ្នកសម្របសម្រួលថាខ្លួនបានត្រៀមរួចរាល់ក្នុងការបន្តចរចាបទឈប់បាញ់។ 

ប្រភពវេជ្ជសាស្ត្របានប្រាប់សារព័ត៌មាន Al Jazeera ថា មនុស្ស៨នាក់បានស្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើលំនៅដ្ឋានមួយនៅទីក្រុងហ្កាហ្សាភាគខាងជើង។

ការសម្លាប់នេះកើតឡើងនៅពេលដែលអ៊ីស្រាអែលបង្កើនការវាយប្រហាររបស់ខ្លួនលើទីក្រុងហ្កាហ្សា ដែលជាទីក្រុងធំជាងគេក្នុងតំបន់រងការឡោមព័ទ្ធមួយនេះ បន្ទាប់ពីគណៈរដ្ឋមន្ត្រីសន្តិសុខរបស់ប្រទេសនេះ បានអនុម័តផែនការសម្រាប់យោធាដណ្តើមយកទីក្រុងនេះ ជាប្រតិបត្តិការមួយដែលអាចបង្ខំប្រជាជនប៉ាឡេស្ទីនរាប់សែននាក់ទៅកាន់តំបន់ប្រមូលផ្តុំនៅភាគខាងត្បូងហ្កាហ្សា។

ផែនការនេះបានទាក់ទាញការថ្កោលទោសជាអន្តរជាតិពីអង្គការសហប្រជាជាតិ ហើយថែមទាំងមានការខ្វែងគំនិតគ្នាពីក្នុងជួរយោធារបស់អ៊ីស្រាអែលទៀតផង។

អ្នកឆ្លើយឆ្លងព័ត៌មាន Al Jazeera បានរាយការណ៍កាលពីថ្ងៃព្រហស្បតិ៍ថា តំបន់ដ៏ធំនៃភាគខាងជើង ហ្កាហ្សា ត្រូវបានប្រែក្លាយទៅជា ដីគ្មានមនុស្សរស់នៅ ស្របពេលអ៊ីស្រាអែលសម្រុកវាយលុក៕