សភារុស្ស៊ី បាននិយាយកាលពីថ្ងៃព្រហស្បតិ៍ (១៤ សីហា) ថា ប្រធានសភា Duma រដ្ឋរបស់រុស្ស៊ី ដែលជាសភាជាន់ទាប លោក Vyacheslav Volodin បានជួបជាមួយមេដឹកនាំកូរ៉េខាងជើង លោក Kim Jong Un អំឡុងដំណើរទស្សនកិច្ចផ្លូវការ ទៅកាន់ទីក្រុងព្យុងយ៉ាង។

លោក Volodin ដែលជាសម្ព័ន្ធមិត្តជិតស្និទ្ធរបស់លោកប្រធានាធិបតីរុស្ស៊ី Vladimir Putin បាននាំយកការផ្ដាំសួរសុខទុក្ខរបស់មេដឹកនាំរុស្ស៊ីរូបនេះទៅកាន់លោក Kim និងបានថ្លែងអំណរគុណសម្រាប់ការគាំទ្ររបស់កូរ៉េខាងជើង ចំពោះយុទ្ធនាការយោធារុស្ស៊ី នៅអ៊ុយក្រែន។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃសុក្រនេះថា លោក Kim បានផ្ញើការឆ្លើយតបទៅនឹងលិខិតមួយពីលោក Putin ដែលត្រូវប្រគល់ដោយលោក Volodin ដើម្បីប្រារព្ធខួបលើកទី៨០ នៃការរំដោះពីអាណានិគមជប៉ុន។ ក្នុងលិខិតផ្ញើជូនលោក Putin នោះ លោក Kim និយាយថា ទាហានកូរ៉េខាងជើង និងរុស្ស៊ី បានបង្កើត "មិត្តភាព និងការរួបរួម" ក្នុងសមរភូមិ ដើម្បីប្រយុទ្ធប្រឆាំងនឹង "សត្រូវរួមគ្នា" ដែលលោកមិនបញ្ចេញឈ្មោះនោះទេ នេះបើយោងតាម KCNA ។

ទំនាក់ទំនងរវាងទីក្រុងព្យុងយ៉ាង និងទីក្រុងមូស្គូ បានកើនឡើងកាន់តែខឲស៊ីជម្រៅក្នុងប៉ុន្មានឆ្នាំមកនេះ ហើយភាគីទាំងពីរបានបញ្ជាក់ពីការដាក់ពង្រាយកងទ័ពកូរ៉េខាងជើង ដើម្បីគាំទ្រការវាយលុករបស់រុស្ស៊ី ប្រឆាំងនឹងអ៊ុយក្រែន ដើម្បីដណ្តើមយកតំបន់ Kursk មកវិញ៕