ប្រមុខកងទ័ពរបស់ប្រទេសស៊ូដង់កាលពីថ្ងៃព្រហស្បតិ៍ បានប្តេជ្ញាថា នឹងមិនមានការសម្របសម្រួល ជាមួយកងកម្លាំងយោធាប៉ារ៉ាគាំទ្ររហ័ស (RSF) ដែលបានធ្វើសង្រ្គាមជាមួយកងទ័ពធម្មតាអស់រយៈពេលជាង ពីរឆ្នាំ ចំពេលមានវិបត្តិមនុស្សធម៌កាន់តែធ្ងន់ធ្ងរឡើង។

ថ្លែងនៅក្នុងខួបមួយសតវត្សរ៍នៃការបង្កើតកងកម្លាំងប្រដាប់អាវុធស៊ូដង់ លោកឧត្តមសេនីយ៍ Abdel Fattah Al-Burhan បានបន្តការប្តេជ្ញាចិត្តរបស់លោកចំពោះ «ការប្រយុទ្ធដើម្បីសេចក្តីថ្លៃថ្នូរ» ដើម្បីកម្ចាត់ការបះបោរ ហើយមិនធ្វើការសម្រុះសម្រួល ឬការផ្សះផ្សា ទោះបីស្ថិតក្នុងតម្លៃណាក៏ដោយ»។

ការអត្ថាធិប្បាយរបស់លោក បានធ្វើឡើង ត្រឹមតែប៉ុន្មានថ្ងៃបន្ទាប់ពីកិច្ចប្រជុំសម្ងាត់ ក្នុងប្រទេសស្វ៊ីស រវាងលោក Burhan និងបេសកជនអាមេរិកទទួលបន្ទុកកិច្ចការអាហ្រ្វិក លោក Massad Boulos។

យោងតាមប្រភពពីររបស់រដ្ឋាភិបាលស៊ូដង់ លោកទាំងពីរ បានពិភាក្សាអំពីផែនការសន្តិភាពថ្មីរបស់សហរដ្ឋអាមេរិក។ រហូតមកដល់ពេលនេះ កិច្ចខិតខំប្រឹងប្រែងសម្របសម្រួលដឹកនាំដោយទីក្រុងវ៉ាស៊ីនតោន និងទីក្រុងរីយ៉ាដ បានបរាជ័យក្នុងការទទួលបានបទឈប់បាញ់។

កងកម្លាំងយោធាប៉ារ៉ាគាំទ្ររហ័សដែលដឹកនាំដោយលោកឧត្តមសេនីយ៍ Mohamed Hamdan Dagalo បានព្យាយាមបង្កើតរដ្ឋបាលស្របគ្នាមួយ នៅភាគខាងលិចប្រទេសស៊ូដង់ នៅលើទឹកដី ក្រោមការគ្រប់គ្រងរបស់ពួកគេ។

ក្រុមប្រឹក្សាសន្តិសុខអង្គការសហប្រជាជាតិ បានថ្កោលទោសយ៉ាងដាច់អហង្ការចំពោះចំណាត់ការនេះកាលពីថ្ងៃពុធ ដោយហៅវាថាជា «ការគំរាមកំហែងដោយផ្ទាល់ចំពោះឯកភាព និងបូរណភាពទឹកដីរបស់ប្រទេសស៊ូដង់»។