ជំនួយការគោលនយោបាយការបរទេសវិមានក្រឹមឡាំង លោក Yury Ushakov បាននិយាយកាលថ្ងៃព្រហស្បតិ៍ (១៤ សីហា) ថា ប្រធានាធិបតីរុស្ស៊ី លោក Vladimir Putin នឹងជួបពិភាក្សាជាមួយប្រធានាធិបតីអាមេរិក លោក Donald Trump នៅមុនពេលកិច្ចប្រជុំគណៈប្រតិភូនៃប្រទេសទាំងពីរ។ លោកបន្តថា កិច្ចពិភាក្សានេះនឹងផ្តោតលើការសម្របសម្រួលដោះស្រាយវិបត្តិអ៊ុយក្រែន និង "បញ្ហាអន្តរជាតិ និងតំបន់ ដែលមានភាពតានតឹងបំផុត"។

សូមជម្រាបជូនថា ជំនួបកំពូលនេះត្រូវបានកំណត់ពេលនៅម៉ោងក្នុងស្រុក ១១ព្រឹក នៅក្នុងមូលដ្ឋានយោធា Elmendorf-Richardson ក្នុងទីក្រុង Anchorage ដែលជាទីក្រុងធំបំផុតក្នុងរដ្ឋអាឡាស្កា របស់សហរដ្ឋអាមេរិក។ លោក Ushakov បាននិយាយថា មេដឹកនាំទាំងពីរត្រូវរំពឹងថានឹងផ្លាស់ប្តូរទស្សនៈស្តីពីការអភិវឌ្ឍបន្ថែមទៀតនៃទំនាក់ទំនងទ្វេភាគី រួមទាំងក្នុងវិស័យពាណិជ្ជកម្ម និងសេដ្ឋកិច្ច។

មន្រ្តីវិមានក្រឹមឡាំងរូបនេះបានបន្ថែមថា លោក Putin និងលោក Trump នឹងធ្វើសន្និសីទសារព័ត៌មានរួមគ្នាមួយ បន្ទាប់ពីកិច្ចពិភាក្សារួច។ លោក Ushakov បញ្ជាក់ថា ក្រោយមក កិច្ចប្រជុំគណៈប្រតិភូទាំងពីរនឹងធ្វើឡើង ដោយគណៈប្រតិភូរុស្ស៊ី នឹងរួមបញ្ចូលរដ្ឋមន្ត្រីការបរទេសរុស្ស៊ី លោក Sergei Lavrov; រូបលោក Ushakov ផ្ទាល់; រដ្ឋមន្ត្រីការពារជាតិ លោក Andrey Belousov; រដ្ឋមន្ត្រីហិរញ្ញវត្ថុ លោក Anton Siluanov; និងប្រធានផ្នែកវិនិយោគរបស់មេដឹកនាំរុស្ស៊ី គឺលោក Kirill Dmitriev ៕