អ៊ីស្រាអែល៖ ប្រជាជនប៉ាឡេស្ទីននៃសង្កាត់មួយនៅភាគខាងកើតទីក្រុងហ្ស៊េរ៉ុយសេឡឹម បានប្រឈមមុខទៅនឹងភាពតានតឹងជាមួយអាជ្ញាធរប្រទេសអ៊ីស្រាអែលកាលពីថ្ងៃចន្ទ ខណៈនគរបាលបានមកបណ្តេញពួកគេចេញពីតំបន់ដែលមានភាពចម្រូងចម្រាស។ ប្រជាជនច្រើននាក់នៅក្នុងលំនៅឋានមួយក្នុងតំបន់ Sheikh Jarrah បានឡើងទៅលើដំបូលផ្ទះដោយមានធុងហ្គាស និងបានគំរាមដុតខ្លួនឯង ប្រសិនបើទីក្រុងហ្ស៊េរ៉ុយសេឡឹមធ្វើតាមការឲ្យបណ្តេញចេញនេះ។
ប្រជាជននិយាយថា ពួកគេបានទិញអចលនទ្រព្យនេះ នៅពេលដែលប្រទេសអ៊ីស្រាអែលបានកាន់កាប់ទីក្រុងហ្ស៊េរ៉ុយសេឡឹមខាងកើត ខណៈរដ្ឋបានអះអាងនៅក្នុងតុលាការថា គ្រួសារនេះគ្មានសិទ្ធិលើអចលនទ្រព្យនោះទេ។ ទីក្រុងហ្ស៊េរ៉ុយសេឡឹមបានរឹបអូសអចលនទ្រព្យជាផ្លូវការក្នុងឆ្នាំ២០១៧ ក្នុងគោលបំណងនៃតំរូវការសាងសង់សាលារៀន។ តុលាការក្រុងហ្ស៊េរ៉ុយសេឡឹមបានចេញសេចក្តីសម្រេចកាលពីឆ្នាំមុនក្នុងការគាំទ្រទីក្រុង និងបានអនុញ្ញាតឱ្យមានការបណ្តេញប្រជាជនចេញ។ សាលាក្រុង និងនគរបាលបានចេញសេចក្តីថ្លែងការណ៍រួមមួយដោយនិយាយថា តុលាការបានបញ្ជាឲ្យក្រុមគ្រួសាររុះរើទ្រព្យសម្បត្តិកាលពីមួយឆ្នាំមុន។
សាលាក្រុងបាននិយាយថា អចលនទ្រព្យនេះនឹងត្រូវប្រើប្រាស់សម្រាប់សាងសង់សាលារៀន ដែលបម្រើដល់កុមារប៉ាឡេស្ទីននៅក្នុងសង្កាត់។ Sheikh Jarrah គឺជាសង្កាត់មួយនៅក្រុងហ្ស៊េរ៉ុយសេឡឹមខាងកើត ដែលប្រជាជនប៉ាឡេស្ទីនរាប់សិបនាក់រស់នៅជាយូរមកហើយ កំពុងប្រយុទ្ធទៅនឹងការព្យាយាមរបស់ក្រុមអ្នកតាំងលំនៅជនជាតិជ្វីហ្វ ក្នុងការបណ្តេញពួកគេចេញពីលំនៅឋាន។ ករណីនេះ ស្ថិតនៅក្នុងតុលាការកំពូលរបស់ប្រទេសអ៊ីស្រាអែល រយៈពេលជាច្រើនខែមកហើយបានធ្វើឲ្យមានការចាប់អារម្មណ៍ជាសកល និងជំរុញឲ្យមានអំពើហិង្សារវាងអ៊ីស្រាអែល និងប៉ាឡេស្ទីនកាលពីឆ្នាំមុន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
