អាជ្ញាធរគ្រោះមហន្តរាយ នៅថ្ងៃសុក្រ (ទី១៥ ខែសីហា) នេះ បានឲ្យដឹងថា ភ្លៀងធ្លាក់ខ្លាំង នៅរដូវមូសុង បានបង្កឲ្យមានបំណាក់ដី និងទឹកជំនន់យ៉ាងគំហុកភ្លាមៗ នៅទូទាំងភាគខាងជើងប្រទេសប៉ាគីស្ថាន ដោយបានបណ្ដាលឲ្យមនុស្សយ៉ាងហោចណាស់ ៥០នាក់ស្លាប់ ក្នុងរយៈពេល ២៤ម៉ោងចុងក្រោយនេះ ខណៈដែលជាច្រើននាក់ទៀតជាប់នៅក្នុងគំនរបាក់បែកនៃផ្ទះសម្បែងរបស់ពួកគេ។

យោងតាមអាជ្ញាធរគ្រប់គ្រងគ្រោះមហន្តរាយខេត្ត បានឲ្យដឹងថា ភាគច្រើននៃអ្នកស្លាប់ ពោលគឺចំនួន ៤៣នាក់ ត្រូវបានកត់ត្រានៅក្នុងខេត្តតំបន់ភ្នំ Khyber Pakhtunkhwa។ ចំណែកអាជ្ញាធរគ្រប់គ្រងគ្រោះមហន្តរាយក្នុងតំបន់ បានប្រាប់ថា មនុស្ស ៧នាក់ទៀត បានបាត់បង់ជីវិតនៅក្នុងតំបន់ Kashmir ដែលស្ថិតក្រោមការគ្រប់គ្រងដោយប៉ាគីស្ថាន។

ទីភ្នាក់ងារគ្រោះមហន្តរាយខេត្ត បានប្រាប់បណ្ដាញសារព័ត៌មានថា ភ្លៀងធ្លាក់ខ្លាំងកើតមានឡើងភ្លាមៗនេះ បានបំផ្លិចបំផ្លាញផ្ទះសម្បែងជាច្រើនខ្នង នៅតំបន់ Bajaur ភាគពាយ័ព្យ ដោយបាននាំឲ្យមនុស្ស ១៦នាក់ស្លាប់ ហើយជាង ២០នាក់ទៀតជាប់នៅនឹងកន្លែងទៅណាមិនរួច។

ជាមួយគ្នានេះ នាយកដ្ឋានឧតុនិយមក៏បានចេញសេចក្តីជូនដំណឹងផងដែរ អំពីភ្លៀងធ្លាក់ខ្លាំង សម្រាប់តំបន់ភាគពាយ័ព្យ ដោយជំរុញឲ្យប្រជាជនចៀសវាង «កុំទៅកាន់តំបន់ងាយរងគ្រោះ ប្រសិនបើមិនចាំបាច់»។

គួរបញ្ជាក់ថា រដូវមូសុងប្រចាំឆ្នាំ នាំឲ្យប្រទេសអាស៊ីខាងត្បូងមានភ្លៀងធ្លាក់ពី ៧០ ទៅ ៨០ភាគរយ ដែលមានសារៈសំខាន់ សម្រាប់វិស័យកសិកម្ម និងសន្តិសុខស្បៀង ប៉ុន្តែវាក៏នាំមកនូវការបំផ្លិចបំផ្លាញផងដែរ។ នៅឆ្នាំ២០២២ ទឹកជំនន់ នៅរដូវមូសុងនេះ បានធ្វើឲ្យតំបន់ ១ភាគ៣នៃផ្ទៃប្រទេសលិចលង់ និងបានឆក់យកជីវិតមនុស្ស ១.៧០០នាក់៕