ជាការប្រឈមនឹងសីតុណ្ហភាពហក់ឡើងខ្ពស់ ក្រុមមូស្លីមនិកាយស៊ីអ៊ីត បានជួបជុំគ្នានៅទីក្រុងពិសិដ្ឋ Karbala ប្រទេសអ៊ីរ៉ាក់ ដើម្បីប្រារព្ធពិធីបុណ្យសាសនា Arbaeen ។

ជាការទប់ទល់នឹងអាកាសធាតុក្តៅខ្លាំងបំផុតពេលដែលសីតុណ្ហភាពកាលពីថ្ងៃពុធកើនឡើងដល់ ៤៧អង្សាសេនៅក្នុងទីក្រុង Karbala ក្រុមធម្មយាត្រាមួយចំនួន បានងាកមកដើរនៅពេលយប់ និងសម្រាកនៅពេលថ្ងៃ ឬស្វែងរកជម្រកនៅតាមព្រះវិហារត្រជាក់ៗ ។

ប៉ុន្តែទោះបីជាអាកាសធាតុក្តៅខ្លំាងបែបណាក្តៅ ការជួបជុំគ្នានៅតែមានចំនួនច្រើននៅពេលថ្ងៃ ។

លោក Muslim Fadhil គឺជាធម្មយាត្រាមួយរូបនិយាយថា ពួកយើងពិតជាមានការភ្ញាក់ផ្អើលខ្លាំងណាស់ចំពោះចំនួនមនុស្សដ៏ច្រើនសន្ធឹកសន្ធាប់ ធ្វើដំណើរមកកាន់ទីក្រុង Karbala បើទោះបីជាជួបស្ថានភាពលំបាក និងអាកាសធាតុក្តៅខ្លាំងយ៉ាងណាក្តី ។

ក្រុមស្ម័គ្រចិត្ត និងក្រុមអាជ្ញាធរក្នុងស្រុក បានផ្តល់សេវាកម្មរបស់ពួកគេក្នុងការបន្ធូរបន្ថយស្ថានភាពក្តៅខ្លាំងនេះ ជាមួយនឹងការចែកចាយទឹកផឹក ទឹកផ្លែឈើ និងអាហារ ខណៈរថយន្តបាញ់ទឹក ធ្វើឲ្យផ្លូវត្រជាក់ ។

មន្ទីរពេទ្យចល័ត និងកន្លែងសម្រាកមានម្លប់ ត្រូវបានដំឡើងផងដែរ ក្នុងនោះរថយន្តគិលានសង្រ្គោះជាង ៤០គ្រឿង ត្រូវបានដាក់ពង្រាយ ក្នុងការសម្របសម្រួលជាមួយនាយកដ្ឋានសុខភាពទីក្រុង Karbala ។

លោក Haidar Al Shirazi គឺជាធម្មយាត្រាមួយរូបទៀត និយាយថា ឆ្នាំនេះពិតជាវិសេសវិសាលខ្លាំងណាស់ ។ វិធីផ្តល់សេវាកម្មរបស់ពួកគេបានផ្លាស់ប្តូរ ចាប់ពីវិធីចែកចាយអាហារ រហូតដល់ការផ្តល់កន្លែងស្នាក់នៅ ហើយនិងទីកន្លែងត្រជាក់ ។

សូមបញ្ជាក់ថា ពិធីសាសនា Arbaeen ប្រារព្ធធ្វើឡើងជាការបញ្ចប់ការកាន់ទុក្ខរយៈពេល ៤០ថ្ងៃ បន្ទាប់ពីថ្ងៃបុណ្យ Ashura ៕