ប្រធានាធិបតីឥណ្ឌូនេស៊ី លោក Prabowo Subianto នៅថ្ងៃសុក្រ (ទី១៥ ខែសីហា) បាននិយាយថា សំណើថវិការបស់លោក សម្រាប់ឆ្នាំ២០២៦ នឹងត្រូវបានរៀបចំឡើង ដើម្បីធានាថា ប្រទេសអាស៊ីអាគ្នេយ៍មួយនេះមានភាពរឹងមាំ ឯករាជ្យ និងវិបុលភាព ខណៈដែលលោកបានថ្លែងសុន្ទរកថាលើកដំបូងរបស់លោក ស្តីពីគោលនយោបាយសារពើពន្ធទៅកាន់សភា។

សំណើថវិកានេះ គឺជាគម្រោងដំបូងដែលបង្កើតឡើងដោយរដ្ឋបាលរបស់លោក Prabowo បន្ទាប់ពីលោកបានចូលកាន់តំណែងក្នុងខែតុលា ឆ្នាំ២០២៤។ ថវិកាឆ្នាំ២០២៥ ត្រូវបានរៀបចំឡើងដោយអ្នកកាន់តំណែងមុនរបស់លោក គឺលោក Joko Widodo។

លោក Prabowo បានប្ដេជ្ញាថា នឹងដំឡើងការចំណាយ ខណៈដែលលោកប្រឹងប្រែងជំរុញកំណើនសេដ្ឋកិច្ចឲ្យដល់ ៨ភាគរយ អំឡុងអាណត្តិ ៥ឆ្នាំរបស់លោក និងបំពេញតាមការសន្យាពេលធ្វើយុទ្ធនាការរបស់លោក ក្នុងការកែលម្អសុខុមាលភាព និងការសម្រេចបាននូវការផ្គត់ផ្គង់អាហារ និងថាមពលឲ្យបានគ្រប់គ្រាន់។

នៅក្នុងសុន្ទរកថារបស់លោកនោះ លោក Prabowo បាននិយាយថា ឱនភាពថវិកាឆ្នាំ២០២៦ ត្រូវបានគេព្យាករថា មានកម្រិត ២,៤៨ភាគរយនៃផលិតផលក្នុងស្រុកសរុប (GDP)។ លោកបានបន្ថែមថា វិធានការដ៏មានប្រសិទ្ធភាព នឹងត្រូវបានអនុវត្ត ដើម្បីកាត់បន្ថយគម្លាត ហើយប្តេជ្ញាថា នឹងមិនមានឱនភាព នៅឆ្នាំ២០២៧ ឬឆ្នាំ២០២៨ ឡើយ។

សម្រាប់ឆ្នាំ២០២៦ លោកបានស្នើឲ្យការចំណាយចំនួន ៣៣៥សែនកោដិរូពី (២០,៧៤ពាន់លានដុល្លារ)ជុំវិញកម្មវិធីដ៏លេចធ្លោរបស់លោក ដើម្បីផ្តល់អាហារដោយឥតគិតថ្លៃដល់សិស្ស កុមារ និងស្ត្រីមានផ្ទៃពោះចំនួន ៨២,៩លាននាក់៕