ប្រធានាធិបតីសហរដ្ឋអាមេរិក លោក Donald Trump បាននិយាយថា កិច្ចពិភាក្សាផ្ទាល់រយៈពេលជិតបីម៉ោងជាមួយប្រធានាធិបតីរុស្ស៊ី លោក Vladimir Putin កាលពីថ្ងៃសុក្រ ទី១៥ ខែសីហា ពុំបានផ្តល់នូវកិច្ចព្រមព្រៀងណាមួយដើម្បីបញ្ឈប់សង្គ្រាមរបស់ទីក្រុងមូស្គូនៅអ៊ុយក្រែនឡើយ ទោះបីជាលោកបានចាត់ទុកជំនួបនេះថា «ប្រកបដោយផ្លែផ្កា» ក៏ដោយ។

អំឡុងពេលថ្លែងសុន្ទរកថាទៅកាន់អ្នកសារព័ត៌មាន មេដឹកនាំទាំងពីរបាននិយាយថា ជំនួបនេះបានធ្វើឲ្យមានវឌ្ឍនភាពលើបញ្ហាជាច្រើនដែលពុំបានបញ្ជាក់ច្បាស់ ប៉ុន្តែពីរពុំបានផ្តល់ព័ត៌មានលម្អិត និងមិនទទួលយកសំនួរអ្វីឡើយ។

លោក Trump បាននិយាយដោយឈរនៅពីមុខផ្ទាំងខាងក្រោយដែលមានអំណានថា «ស្វែងរកសន្តិភាព» ថា «មានចំណុចជាច្រើន ដែលយើងបានព្រមព្រៀង»។

លោកបាននិយាយបន្ថែមថា «គ្មានកិច្ចព្រមព្រៀងទេ រង់ចាំរហូតដល់មានកិច្ចព្រមព្រៀងពិត»។ វាមិនច្បាស់ភ្លាមៗនោះទេថាតើកិច្ចពិភាក្សានេះបានបង្កើតជំហានដ៏មានន័យឈានឆ្ពោះទៅរកបទឈប់បាញ់នៅក្នុងជម្លោះដ៏បង្ហូរឈាមបំផុតនៅអឺរ៉ុបក្នុងរយៈពេល៨០ឆ្នាំមកនេះ ឬយ៉ាងណា ។

នៅក្នុងសុន្ទរកថាខ្លី លោកPutin បាននិយាយថា លោករំពឹងថាអ៊ុយក្រែន និងសម្ព័ន្ធមិត្តអឺរ៉ុបរបស់ខ្លួន នឹងទទួលយកលទ្ធផលនៃការចរចារវាងសហរដ្ឋអាមេរិក និងរុស្ស៊ីប្រកបដោយការស្ថាបនា និងមិនព្យាយាម «រំខានដល់វឌ្ឍនភាពដែលកំពុងកើតមាន»។ លោកPutin និយាយថា «ខ្ញុំរំពឹងថាកិច្ចព្រមព្រៀងនៅថ្ងៃនេះ នឹងក្លាយជាចំណុចយោងមួយ មិនត្រឹមតែសម្រាប់ការដោះស្រាយបញ្ហានៅអ៊ុយក្រែនប៉ុណ្ណោះទេ ប៉ុន្តែក៏នឹងចាប់ផ្តើមការស្តារឡើងវិញនូវទំនាក់ទំនងដែលមានលក្ខណៈជាក់ស្តែង ដូចជាពាណិជ្ជកម្មរវាងរុស្ស៊ី និងសហរដ្ឋអាមេរិកផងដែរ។ ពុំមានប្រតិកម្មភ្លាមៗពីទីក្រុងគីវ នៅឡើយទេ។