នគរបាលរបស់ប្រទេសស៊ែប៊ី បានប្រើប្រាស់ឧស្ម័នបង្ហូរទឹកភ្នែក និងរថយន្តគ្រប់គ្រងហ្វូងមនុស្ស កាលពីល្ងាចថ្ងៃសុក្រ (ទី១៥ ខែសីហា) នៅទីក្រុងបែលក្រាដ ដើម្បីបំបែកក្រុមបាតុករប្រឆាំងរដ្ឋាភិបាល ដែលបានគប់ផាវ និងដុំភ្លើងទៅលើមន្ត្រីនគរបាល ជាអ្វីដែលត្រូវបានគេមើលឃើញថា ជាការកើនឡើងនូវភាពតានតឹងដ៏ធំនៃការតវ៉ាដែលមានរយៈពេល ៩ខែមកហើយ។

ក្រុមអ្នកតវ៉ាបានប្រមូលផ្តុំគ្នានៅម៉ោងប្រហែល ៨យប់ ម៉ោងក្នុងស្រុក (ត្រូវនឹង ១៨ ម៉ោងសកល) នៅមុខអគារទីបញ្ជាការកងទ័ពដែលបានរងការទម្លាក់គ្រាប់បែក ក្នុងឆ្នាំ១៩៩៩ ដោយអង្គការណាតូ។ ប៉ុន្មានម៉ោងក្រោយមក ពួកគេបានចាប់ផ្តើមគប់ដុំភ្លើងទៅលើមន្ត្រីនគរបាល។

កុងតឺន័រដាក់សំរាមត្រូវបានក្រឡាប់ និងដុត ហើយដើមឈើមួយដើមត្រូវបានភ្លើងឆាបឆេះ។ នគរបាលបានចាប់ផ្ដើមគប់កំប៉ុងឧស្ម័នបង្ហូរទឹកភ្នែក ដើម្បីបំបែកក្រុមបាតុករ។

ការតវ៉ាត្រូវបានធ្វើឡើងនៅក្នុងក្រុងមួយចំនួនទៀតដែរ គឺ Novi Sad, Nis, Kragujevac និង Valjevo។ ហើយឧស្ម័នបង្ហូរទឹកភ្នែកក៏ត្រូវបានប្រើប្រាស់ផងដែរ នៅទីក្រុង Nis។ មិនមានតួលេខផ្លូវការថា តើមានមនុស្សប៉ុន្មាននាក់បានរងរបួសនោះឡើយ។

គួរបញ្ជាក់ថា ការតវ៉ាជាច្រើនខែនៅទូទាំងប្រទេសស៊ែប៊ី បានធ្វើឲ្យលោកប្រធានាធិបតី Aleksandar Vucic និងគណបក្ស SNS របស់លោករង្គោះរង្គើ។ ការតវ៉ាត្រូវបានបង្កឡើងដោយការស្លាប់របស់មនុស្ស ១៦នាក់ នៅពេលដែលដំបូលជួសជុលឡើងវិញ នៅលើស្ថានីយ៍រថភ្លើង ក្នុងទីក្រុង Novi Sad បានបាក់ធា្លក់៕