គណៈកម្មាធិការវិនិយោគកម្ពុជា ពិនិត្យពិភាក្សាលើសំណើសុំចុះបញ្ជី គម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ១៧ គម្រោង មានទុនសរុបប្រមាណ ៣៦៧ លានដុល្លារអាម៉េរិក ក្នុងនោះការវិនិយោគលើវិស័យឧស្សាហកម្មចំនួន១៥ និងវិស័យហេដ្ឋារចនា- សម្ព័ន្ធចំនួន ២ គម្រោង។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅចុងសប្តាហ៍កន្លងមកនេះ បានអញ្ជើញជាអធិបតីភាព “កិច្ចប្រជុំច្រកចេញ-ចូលតែមួយ” លើកទី១២ ក្នុងឆ្នាំ២០២៥ រៀបចំឡើងដើម្បីពិនិត្យ ពិភាក្សាលើសំណើ សុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ ចំនួន ១៧ គម្រោង។

គម្រោងខាងលើនេះ មានទុនវិនិយោគសរុបប្រមាណ ៣៦៧ លានដុល្លារអាម៉េរិក អាចបង្កើតការងារបានប្រមាណ ៧,២ ពាន់ កន្លែង ក្នុងនោះការវិនិយោគលើវិស័យឧស្សាហកម្មចំនួន១៥គម្រោងរួមមាន៖ ផលិតឧបករណ៍ផ្ទុកថាមពល និងគ្រឿងអគ្គិសនី ផ្សេងៗ, ផលិតបន្ទះក្តារកម្រាល និងបន្ទះក្តារសម្រាប់តុបតែងផ្សេងៗ, ផលិតសម្ភារៈកីទ្បា, កែច្នៃផ្លែឈើ, ផលិតសម្ភារៈក្មេងលេង, ផលិតសម្ភារៈ តុបតែងសម្រាប់ពិធីបុណ្យ, ផលិតឧបករណ៍ជាងនិងសម្ភារៈបន្ទាប់បន្សំ, ផលិតបរិក្ខារអគ្គិសនីបំភ្លឺ និងគ្រឿងអគ្គិសនីសម្រាប់ប្រើប្រាស់ ក្នុងផ្ទះ, បង្កើតសួនឧស្សាហកម្ម, ផលិតបរិក្ខារអគ្គិសនីបំភ្លឺ, គ្រឿងអគ្គិសនី និងប្រអប់ដាក់សម្ភារៈជាង, កែច្នៃលោហធាតុ, ផលិតសម្ភារៈ ប្រើប្រាស់និងសម្ភារៈសម្រាប់ពិធីបុណ្យគ្រប់ប្រភេទពីប្លាស្ទិក, និងផលិតអំពូលភ្លើង និងអំពូលភ្លើងលម្អគ្រប់ប្រភេទ។

ចំណែកការវិនិយោគលើវិស័យហេដ្ឋារចនាសម្ព័ន្ធចំនួន ២ គម្រោង រួមមាន៖ អភិវឌ្ឍន៍ស្ថានីយប្រព័ន្ធអាគុយស្តុកទុកថាមពល អានុភាព ២០០ មេហ្គាវ៉ាត់ / ៤០០មេហ្គាវ៉ាត់ម៉ោង ក្នុងខេត្តពោធិ៍សាត់ និងអភិវឌ្ឍន៍ស្ថានីយប្រព័ន្ធអាគុយស្តុកទុកថាមពលអានុភាព ៣០០ មេហ្គាវ៉ាត់ / ៦០០ មេហ្គាវ៉ាត់ម៉ោងក្នុងខេត្តកំពង់ឆ្នាំង។

សូមបញ្ជាក់ថា ចំពោះគម្រោងវិនិយោគទាំង ១៧ ដែលអង្គប្រជុំបានពិនិត្យ ពិភាក្សាខាងលើនេះ ក្នុងនោះក្រុមវិនិយោគិនបានជ្រើសរើស បង្កើតរោងចក្ររបស់ខ្លួន មានទីតាំងនៅខេត្តតាកែវ កំពង់ស្ពឺ កំពង់ឆ្នាំង ពោធិ៍សាត់ និងបាត់ដំបង៕ អត្ថបទ៖ សុន រ៉ាឌី,