តំណាងអចិន្ត្រៃយ៍របស់រុស្ស៊ីនៅអង្គការអន្តរជាតិនៅទីក្រុងវីយែនលោក Mikhail Ulyanov បានសរសេរនៅលើបណ្តាញTelegram របស់លោកថា លោកខាងលិច គួរតែផ្តល់ឲ្យរុស្ស៊ីនូវការធានាសន្តិសុខដែលអាចទុកចិត្តបាន ដូចដែលខ្លួនបានសន្យាចំពោះអ៊ុយក្រែនដែរ។

សេចក្តីថ្លែងការណ៍របស់លោកបានឲ្យដឹងថា៖«មេដឹកនាំសហភាពអឺរ៉ុបជាច្រើន បានសង្កត់ធ្ងន់ថា កិច្ចព្រមព្រៀងសន្តិភាពនាពេលអនាគត គួរតែផ្តល់នូវការធានាសន្តិសុខដែលអាចទុកចិត្តបានសម្រាប់អ៊ុយ   ក្រែន។ ប្រទេសរុស្ស៊ីយល់ស្របនឹងបញ្ហានេះដែរ។ ប៉ុន្តែប្រទេសនេះ មានសិទ្ធិគ្រប់យ៉ាងក្នុងការរំពឹងថា ទីក្រុងមូស្គូនឹងទទួលបានការធានាសន្តិសុខប្រកបដោយប្រសិទ្ធភាពផងដែរ»។

យោងតាមលោក Ulyanov លោកខាងលិច កំពុងមានកំហុសមួយ ដោយមិនចាប់ផ្តើមពិភាក្សាអំពីជំហានបែបនេះ ទាក់ទងនឹងរុស្ស៊ី។ អ្នកតំណាងអចិន្ត្រៃយ៍រូបនេះ បានសង្កត់ធ្ងន់ថា ការធានាទាំងនេះ គួរតែ «គួរឲ្យទុកចិត្តបាន ជាងការសន្យាមិនស្មោះត្រង់អំពីការមិនពង្រីកសមាជិកភាពរបស់អង្គការណាតូទៅភាគខាងកើត។

នាពេលមុននេះ បន្ទាប់ពីកិច្ចប្រជុំតាមអនឡាញ សម្ព័ន្ធនៃឆន្ទៈ បានបញ្ជាក់ពីការត្រៀមខ្លួនរបស់ខ្លួន ក្នុងការបញ្ជូន «កម្លាំងធានាសន្តិសុខ»ពហុជាតិទៅអ៊ុយក្រែនភ្លាមៗ នៅពេលដែលអរិភាព ត្រូវបានបញ្ឈប់។ សមាជិកនៃក្រុមប្រទេសដែលមានបំណងជួយទីក្រុងគីវ ក៏បានវាយតម្លៃខ្ពស់ចំពោះការប្តេជ្ញាចិត្តរបស់លោកប្រធានាធិបតី ដូណាល់ ត្រាំ (Donald Trump) ក្នុងការផ្តល់ការធានាសន្តិសុខដល់អ៊ុយក្រែន ដែលក្នុងនោះ សម្ព័ន្ធនៃឆន្ទៈ នឹងដើរតួនាទីយ៉ាងសំខាន់តាមរយៈកងកម្លាំងពហុជាតិសម្រាប់អ៊ុយក្រែន ជាផ្នែកនៃវិធានការផ្សេងទៀត។