ប្រធានគម្រោងនេះ បាននិយាយកាលពីថ្ងៃអាទិត្យថា អាជ្ញាធរអ៊ីរ៉ាក់ បានចាប់ផ្តើមជីកកកាយទីតាំងនៃផ្នូរដ៏ធំមួយ ដែលគេជឿថា មានផ្ទុកសាកសពជនរងគ្រោះរាប់ពាន់នាក់របស់ក្រុមភេរវករ Daesh នៅជិតទីក្រុង Mosul។

នាយកគម្រោងលោក Ahmed Assadi បាននិយាយថា ដំណាក់កាលទី១ ដែលត្រូវបានចាប់ផ្តើម នៅថ្ងៃទី ១០ ខែសីហា រួមមានការជីកកកាយដីនៅផ្នូរ Khasfa។

អ្នកឆ្លើយឆ្លងព័ត៌មាន AFP ម្នាក់ដែលបានទៅមើលទីតាំងនៅភាគខាងជើងប្រទេសអ៊ីរ៉ាក់កាលពីថ្ងៃអាទិត្យនោះ បាននិយាយថា ក្រុមនេះ បានរកឃើញលលាដ៍ក្បាលមនុស្សជាច្រើន ដែលត្រូវបានគេកប់ នៅក្នុងដីខ្សាច់។

ផ្នូរ Khasfa មានទីតាំងនៅជិតទីក្រុង Mosul ជាកន្លែងដែលក្រុម Daesh បានបង្កើតរដ្ឋធានីនៃរដ្ឋកាលីហ្វ ដែលគេប្រកាសដោយខ្លួនឯង មុនពេលត្រូវបានកម្ចាត់ នៅក្នុងប្រទេសអ៊ីរ៉ាក់ នៅចុងឆ្នាំ ២០១៧។

លោក Assadi បាននិយាយថា មិនមានតួលេខច្បាស់លាស់សម្រាប់ចំនួនជនរងគ្រោះដែលកប់នៅទីនោះទេ ដែលជាផ្នូរដ៏ធំមួយ ក្នុងចំណោមផ្នូរជាច្រើនដែលក្រុម Daesh បានបន្សល់ទុក នៅក្នុងប្រទេសអ៊ីរ៉ាក់ ប៉ុន្តែរបាយការណ៍របស់អង្គការសហប្រជាជាតិពីឆ្នាំ ២០១៨ បានបញ្ជាក់ថា ផ្នូរ Khasfa ទំនងជាផ្នូរធំបំផុតនៅក្នុងប្រទេសនេះ។

ការប៉ាន់ស្មានជាផ្លូវការ បានដាក់ចំនួនសាកសពដែលកប់នៅកន្លែងនោះ យ៉ាងហោចណាស់ ៤.០០០នាក់ដោយអាចមានរាប់ពាន់នាក់បន្ថែមទៀត។