អ្នកនាំពាក្យយោធានៃចលនានេះ លោក Yahya Saree បាននិយាយថា ក្រុមហ៊ួទីមកពីចលនាឧទ្ទាម Ansar Allah បានវាយប្រហារដោយមីស៊ីលលើអាកាសយានដ្ឋាន Ben Gurion នៃទីក្រុង Tel Aviv របស់អ៊ីស្រាអែល។

លោកបានប្រាប់ទូរទស្សន៍ Al Masirah ដែលគ្រប់គ្រងដោយក្រុមហ៊ួទីថា៖«កងទ័ពមីស៊ីលនៃកងកម្លាំងប្រដាប់អាវុធយេម៉ែន បានធ្វើប្រតិបត្តិការយោធាពិសេសមួយ និងបានធ្វើការវាយប្រហារលើអាកាសយានដ្ឋាន Lod ដែលត្រូវបានគេស្គាល់ថា ជាអាកាសយានដ្ឋាន Ben Gurion ក្នុងប្រទេសអ៊ីស្រាអែល ជាមួយនឹងមីស៊ីលបាលីស្ទីកល្បឿនលឿនជាងសំឡេង Palestine-2»។

យោងតាមអ្នកនាំពាក្យរបស់ក្រុមហ៊ួទី ប្រតិបត្តិការអាកាសយានដ្ឋាន ត្រូវបានផ្អាក បន្ទាប់ពីការវាយប្រហារនោះ។

កងកម្លាំងការពារអ៊ីស្រាអែល (IDF) បាននិយាយកាលពីថ្ងៃអាទិត្យថា យោធាអ៊ីស្រាអែល បានវាយប្រហារទីតាំងហេដ្ឋារចនាសម្ព័ន្ធថាមពលរបស់ក្រុមហ៊ួទី នៅជិតទីក្រុង Sana ដែលគ្រប់គ្រងដោយក្រុម ឧទ្ទាម។ យោងតាមទូរទស្សន៍ Al Masirah អ៊ីស្រាអែល បានវាយប្រហាររោងចក្រថាមពល Haziz កាលពីព្រឹកព្រលឹមថ្ងៃអាទិត្យ ដោយបណ្តាលឲ្យអគ្គីភ័យឆេះរោងចក្រ។ ភ្លើងត្រូវបានពន្លត់ភ្លាមៗ ហើយការងារជួសជុលឡើងវិញ បានចាប់ផ្តើម។ 

ក្រោយមក កងកម្លាំងការពារអ៊ីស្រាអែល បាននិយាយថា មីស៊ីលដែលបាញ់ចេញពីប្រទេសយេម៉ែន ត្រូវបានស្ទាក់ចាប់។ ពុំមានការរាយការណ៍អំពីអ្នកស្លាប់ ឬការខូចខាតទេ។