ក្រសួងការបរទេសរបស់ទីក្រុងប៉េកាំង នៅថ្ងៃចន្ទ (ទី១៨ ខែសីហា) នេះ បានឲ្យដឹងថា កោះតៃវ៉ាន់ គឺជាបញ្ហាផ្ទៃក្នុង សម្រាប់ប្រទេសចិន ដោយការលើកឡើងនេះជាការឆ្លើយតបទៅនឹងប្រធានាធិបតីអាមេរិក លោក Donald Trump ដែលបាននិយាយថា ប្រធានាធិបតីចិន លោក Xi Jinping បានប្រាប់លោកថា លោកនឹងមិនលុកលុយកោះនេះទេ ខណៈពេលដែលលោក Trump ស្ថិតក្នុងតំណែង។

លោក Trump បានធ្វើការអត្ថាធិប្បាយបែបនេះ ក្នុងអំឡុងពេលផ្ដល់បទសម្ភាសន៍ជាមួយប្រព័ន្ធផ្សព្វផ្សាយ Fox News មុនពេលមានកិច្ចពិភាក្សា នៅរដ្ឋ Alaska ជាមួយប្រធានាធិបតីរុស្ស៊ី លោក Vladimir Putin ជុំវិញសង្រ្គាមរបស់ទីក្រុងមូស្គូ ជាមួយអ៊ុយក្រែន។

នៅឯសន្និសីទសារព័ត៌មានប្រចាំថ្ងៃ ក្នុងទីក្រុងប៉េកាំង នៅពេលត្រូវបានសួរ អំពីសុន្ទរកថារបស់លោក Trump អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា កោះតៃវ៉ាន់ គឺជាផ្នែកដែលមិនអាចកាត់ផ្តាច់បានពីទឹកដីរបស់ចិន។

លោកស្រីបានបញ្ជាក់ថា៖ «បញ្ហាកោះតៃវ៉ាន់ គឺជាកិច្ចការផ្ទៃក្នុងរបស់ចិនសុទ្ធសាធ ហើយរបៀបដោះស្រាយបញ្ហាកោះតៃវ៉ាន់ គឺជាបញ្ហា សម្រាប់ប្រជាជនចិន។ យើងនឹងប្រឹងប្រែងឲ្យអស់ពីសមត្ថភាព ដើម្បីស្វែងរកអនាគតនៃការបង្រួបបង្រួមដោយសន្តិវិធី។ ប៉ុន្តែយើងនឹងមិនអនុញ្ញាតឲ្យនរណាម្នាក់ ឬកម្លាំងណាមួយបំបែកកោះតៃវ៉ាន់ចេញពីប្រទេសចិន តាមមធ្យោបាយណាមួយឡើយ»។

គួរបញ្ជាក់ថា ប្រទេសចិនចាត់ទុកកោះតៃវ៉ាន់ជាដែនដីរបស់ខ្លួន ហើយបានប្តេជ្ញាថា នឹង «បង្រួបបង្រួម» ជាមួយកោះស្វ័យគ្រប់គ្រងតាមបែបប្រជាធិបតេយ្យមួយនេះ។ កោះតៃវ៉ាន់ប្រឆាំងយ៉ាងខ្លាំង ចំពោះការអះអាងអធិបតេយ្យរបស់ប្រទេសចិន៕