មនុស្សស្លាប់ដោយសារភាពអត់ឃ្លាន បានកើនឡើងជារៀងរាល់ថ្ងៃ ស្របពេលដែលការបិទច្រក និងការវាយប្រហារឥតស្រាកស្រាន្តរយៈពេល ២២ខែ របស់អ៊ីស្រាអែល បានធ្វើឲ្យកើតមានគ្រោះទុរ្ភិក្សបង្កឡើងដោយមនុស្សនៅតំបន់ហ្កាហ្សា ។

គិតត្រឹមថ្ងៃទី ១៧ ខែសីហា ឆ្នាំ ២០២៥ម្សិលមិញនេះ ចំនួនមនុស្សដាច់ពោះស្លាប់ បានកើនឡើងដល់ ២៦៣នាក់ រួមទាំងកុមារ ១១២នាក់ផងដែរ ។

នៅចន្លោះខែមីនា និងពាក់កណ្តាលខែឧសភា អ៊ីស្រាអែលបានបិទច្រកចូលតំបន់ហ្កាហ្សាទាំងស្រុង ដោយពួកគេរារាំងការចូលរបស់ស្បៀងអាហារ ទឹកស្អាត និងជំនួយមនុស្សធម៌ ។ ការបិទច្រកនេះ បង្កឲ្យកើតមានកង្វះខាតស្បៀងអាហារយ៉ាងធ្ងន់ធ្ងរ ធ្វើឲ្យពលរដ្ឋដ៏ផុយស្រួយនៅតំបន់ហ្កាហ្សា ធ្លាក់ក្នុងស្ថានភាពអត់ឃ្លានខ្លាំង និងខះជាតិទឹក ។

កាលពីថ្ងៃទី ១៤ ខែសីហា អង្គការមនុស្សធម៌ជាង ១០០ស្ថាប័ន រួមទាំងក្រុមគ្រូពេទ្យគ្មានព្រំដែន ក្រុមលើកលែងទោសអន្តរជាតិ និងក្រុមប្រឹក្សាជនភៀសខ្លួនន័រវែស បានថ្កោលទោសការប្រើប្រាស់ជំនួយជាអាវុធសម្លាប់មនុស្សរបស់អ៊ីស្រាអែល ដោយពួកគេនិយាយថា ពួកគេកំពុងរារាំងជំនួយសង្រ្គោះអាយុជីវិតពីការចូលទៅកាន់តំបន់ហ្កាហ្សា ៕