ប្រធានាធិបតីសហរដ្ឋអាមេរិក លោក Donald Trump បានចាត់ទុកកិច្ចពិភាក្សាកាលពីថ្ងៃចន្ទ ទី១៨ សីហា របស់លោកជាមួយប្រធានាធិបតីអ៊ុយក្រែន លោក Volodymyr Zelenskiy និងដៃគូអឺរ៉ុបផ្សេងទៀតថា«ពិតជាល្អប្រសើរ» និងបាននិយាយថាលោកបានចាប់ផ្តើមការរៀបចំសម្រាប់ជំនួបរវាងប្រធានាធិបតីរុស្ស៊ី លោក Vladimir Putin និងលោក Zelenskiy ។

លោកបាននិយាយបន្ថែមថា ការធានាសន្តិសុខសម្រាប់អ៊ុយក្រែន ដែលផ្តល់ដោយបណ្តាប្រទេសអឺរ៉ុបក្នុងការសម្របសម្រួលជាមួយសហរដ្ឋអាមេរិក ត្រូវបានពិភាក្សាក្នុងអំឡុងពេលកិច្ចប្រជុំ។ មេដឹកនាំទាំងអស់មិនបានធ្វើសន្និសីទសារព័ត៌មានរួមគ្នានោះទេបន្ទាប់ពីកិច្ចប្រជុំ ប៉ុន្តែបានជ្រើសរើសជំនួសដោយការនិយាយសង្ខេបទៅកាន់ប្រព័ន្ធផ្សព្វផ្សាយដាច់ដោយឡែកពីគ្នា។

ប្រធានាធិបតីប្រទេសហ្វាំងឡង់ លោក Alexander Stubb បាននិយាយទៅកាន់អ្នកសារព័ត៌មានហ្វាំងឡង់បន្ទាប់ពីកិច្ចពិភាក្សាថា សមភាគីរុស្ស៊ីរបស់លោកមិនគួរឱ្យទុកចិត្តនោះទេដោយបានចោទជាសំនួរថាតើលោកPutin ពិតជានឹងចូលរួមក្នុងជំនួបជាមួយ លោក Trump និងលោក Zelenskiy ដែរឬទេ។ លោកបាននិយាយថា «លោកPutin កម្រត្រូវបានគេជឿទុកចិត្តណាស់។ ដូច្នេះពេលនេះ វានៅតែត្រូវមើលឃើញថាតើលោកមានភាពក្លាហានក្នុងការទៅចូលរួមជំនួបបែបនេះឬយ៉ាងណា»។ ប្រធានាធិបតីបារាំងលោក Emmanuel Macron បាននិយាយថា កិច្ចពិភាក្សានៅសេតវិមានដែលពាក់ព័ន្ធនឹងលោក Zelenskiy ពុំបានលើកឡើងពីទីក្រុងគីវដែលត្រូវប្រគល់ដែនដីនោះទេ ទោះបីជាមេដឹកនាំសហរដ្ឋអាមេរិកលោក Donald Trump បានអំពាវនាវជាសាធារណៈឱ្យមានការសម្របសម្រួលក៏ដោយ។ នៅពេលត្រូវបានសួរដោយអ្នកសារព័ត៌មានថាតើលោក Trump បាននិយាយថាសម្បទានគឺចាំបាច់ នៅមុនពេលការធានាសន្តិសុខណាមួយរបស់សហរដ្ឋអាមេរិកចំពោះអ៊ុយក្រែន លោកMacron បាននិយាយថា «ទេ វាពុំត្រូវបានលើយកមកពិភាក្សាទាល់តែសោះ។ យើងនៅឆ្ងាយពីរឿងនោះ» ។ លោក Macron បានប្រាប់អ្នកសារព័ត៌មានថា លោក Trump និងមេដឹកនាំអឺរ៉ុប បានព្រមព្រៀងគ្នាលើតម្រូវការសម្រាប់ «កងទ័ពអ៊ុយក្រែនដ៏រឹងមាំដែលអាចទប់ទល់នឹងការប៉ុនប៉ងវាយប្រហារណាមួយ» ហើយវានឹងពុំមាន «ការកំណត់ចំនួន ឬសមត្ថភាពអាវុធ» នោះទេ។