មន្ត្រីក្នុងតំបន់បាននិយាយថា មនុស្សយ៉ាងហោចណាស់២០នាក់បានស្លាប់នៅពេលដែលភ្លៀងមូសុងថ្មីបានបណ្តាលឱ្យមានទឹកជំនន់នៅភាគពាយព្យប្រទេសប៉ាគីស្ថាន ខណៈតំបន់នេះត្រូវបានបំផ្លិចបំផ្លាញរួចទៅហើយដោយរដូវភ្លៀងមូសុងដ៏ខ្លាំងក្លាខុសពីប្រក្រតី។

មន្ត្រីក្នុងតំបន់បានប្រាប់ទីភ្នាក់ងារព័ត៌មានកាលពីថ្ងៃចន្ទថា «ព្យុះភ្លៀងនៅក្នុងតំបន់ Gadoon នៃក្រុង Swabi បានបំផ្លាញលំនៅឋានជាច្រើនខ្នងទាំងស្រុង បណ្តាលឲ្យមនុស្សជាង២០នាក់ស្លាប់»។ ប្រព័ន្ធផ្សព្វផ្សាយក្នុងស្រុករបស់ប៉ាគីស្ថាន ក៏បានរាយការណ៍ផងដែរអំពីអ្នកស្លាប់ចុងក្រោយដោយសារទឹកជំនន់។

មន្ត្រីទី២ បាននិយាយថា ភូមិចំនួន៣ ទៅ ៥ភូមិ ត្រូវបានបំផ្លាញដោយភ្លៀងធ្លាក់ខ្លាំង បណ្តាលឲ្យមាន អ្នកស្លាប់ច្រើននៅក្នុងខេត្ត Khyber Pakhtunkhwa ដែលរងគ្រោះខ្លាំងបំផុត។

ទឹកជំនន់ដ៏គំហុកថ្មីកើតឡើង ខណៈក្រុមអ្នកជួយសង្គ្រោះកំពុងបន្តស្វែងរកមនុស្សយ៉ាងហោចណាស់១៥០នាក់ដែលនៅតែបាត់ខ្លួននៅឡើយនៅក្នុងស្រុកមួយចំនួនទូទាំងខេត្ត ហើយក្នុងពេលដែលទឹកជំនន់បានបណ្តាលឲ្យមនុស្សជាង៣០០នាក់ស្លាប់ក្នុងរយៈពេលប៉ុន្មានថ្ងៃថ្មីៗនេះ។

មន្ត្រីរដ្ឋាភិបាល លោក Awais Babar បាននិយាយថា ក្រុមអ្នកជួយសង្គ្រោះបានជម្លៀសពលរដ្ឋជិត១០០នាក់នៅក្នុងក្រុង Swabi ភាគច្រើនជាស្ត្រី និងកុមារ ដែលបានភៀសខ្លួនឡើងទៅលើដំបូលផ្ទះ។ ប៉ុន្តែភ្លៀងធ្លាក់ខ្លាំងចុងក្រោយនេះ បានបញ្ឈប់កិច្ចខិតខំប្រឹងប្រែងស្វែងរកអ្នកបាត់ខ្លួន។