តម្លៃប្រេងបានធ្លាក់ចុះនៅក្នុងពាណិជ្ជកម្មតំបន់អាស៊ីក្នុងថ្ងៃអង្គារ (១៩ សីហា) នេះ ខណៈទីផ្សារសកលកំពុងតែគិតគូរយ៉ាងប្រយ័ត្នប្រយែងអំពីផែនការចរចាសន្តិភាពត្រីភាគីក្នុងចំណោមប្រទេសរុស្ស៊ី អ៊ុយក្រែន និងសហរដ្ឋអាមេរិក ដើម្បីបញ្ចប់សង្រ្គាមនៅអ៊ុយក្រែន ដែលអាចនាំទៅដល់ការបញ្ចប់ទណ្ឌកម្មលើប្រេងឆៅរបស់រុស្ស៊ី។

តម្លៃភាគហ៊ុនប្រេងឆៅរបស់ Brent បានធ្លាក់ចុះ ៧សេន ឬ ០,១១% មកនៅត្រឹម ៦៦,៥៣ដុល្លារ ក្នុងមួយបារ៉ែលត្រឹមម៉ោងសកល ០០:០០គត់ ឈានចូលថ្ងៃអង្គារនេះ ខណៈតម្លៃហ៊ុនប្រេងឆៅរបស់អាមេរិក WTI សម្រាប់ការចែកចាយនៅខែកញ្ញា ដែលគ្រោងនឹងផុតកំណត់នៅថ្ងៃពុធ (២០ សីហា) ស្អែកនេះ បានធ្លាក់ចុះ ៦សេន ឬ ០,០៩% មកនៅត្រឹម ៦៣,៣៦ដុល្លារ ក្នុងមួយបារ៉ែល។

តម្លៃប្រេងដែលប្រែប្រួលយ៉ាងប្រយ័ត្នប្រយែងនេះ បានកើតឡើងបន្ទាប់ពីកិច្ចពិភាក្សារវាងប្រធានាធិបតីអ៊ុយក្រែន លោក Volodymyr Zelenskiy និងក្រុមសម្ព័ន្ធមិត្តអឺរ៉ុប នៅក្នុងសេតវិមាន កាលពីថ្ងៃចន្ទ ជាមួយលោកប្រធានាធិបតីអាមេរិក Donald Trump។

ក្រោយពីនោះ លោក Trump បាននិយាយថា លោកបានសន្ទនាតាមទូរសព្ទទៅសមភាគីរុស្ស៊ី លោក Vladimir Putin ហើយចាប់ផ្តើមរៀបចំកិច្ចប្រជុំរវាងលោក Putin និងលោក Zelenskiy ហើយក្រោយមកទៀតនឹងមានកិច្ចប្រជុំកំពូលត្រីភាគីក្នុងចំណោមប្រធានាធិបតីទាំងបីរូប៕