សេវាសង្គ្រោះបន្ទាន់ នៅថ្ងៃអង្គារ (ទី១៩ ខែសីហា) នេះ បានប្រាប់ឲ្យដឹងថា យ៉ាងហោចណាស់មនុស្ស ២៥នាក់ ត្រូវបានជួយសង្គ្រោះ ហើយ ២៥នាក់ផ្សេងទៀត កំពុងបាត់ខ្លួន ដោយការប្រកាសនេះ កើតមានឡើង ២ថ្ងៃបន្ទាប់ពីទូកដែលដឹកអ្នកដំណើរប្រហែល ៥០នាក់ បានលិចនៅរដ្ឋ Sokoto ភាគពាយព្យនៃប្រទេសនីហ្សេរីយ៉ា។

ទីភ្នាក់ងារគ្រប់គ្រងគ្រោះអាសន្នជាតិ (NEMA) បានឲ្យដឹងថា មនុស្សចំនួន ២៥នាក់ នៅតែមិនទាន់រកឃើញ ហើយត្រូវបានសន្មតថា ទំនងមិនមានជីវិតទេ។ ទីភ្នាក់ងារនេះ បានបញ្ជាក់នៅក្នុងសេចក្តីថ្លែងការណ៍មួយថា គ្មានសាកសពត្រូវបានរកឃើញឡើយ គិតត្រឹមព្រឹកថ្ងៃអង្គារនេះ។

ក្រុមមន្ត្រីបានប្រាប់ថា ទូកនេះដែលកំពុងដឹកជញ្ជូនស្ត្រី កុមារ និងម៉ូតូទៅកាន់ផ្សារ Goronyo ជាមជ្ឈមណ្ឌលលក់ម្ហូបអាហារ នៅក្នុងតំបន់នោះ បានក្រឡាប់លិច កាលពីថ្ងៃអាទិត្យចុងសប្ដាហ៍កន្លងមក។

លោក Zubairu Yari ប្រធានរដ្ឋបាល ក្នុងតំបន់ Goronyo បាននិយាយថា កិច្ចប្រឹងប្រែងជួយសង្គ្រោះត្រូវបានជួបនឹងឧបសគ្គ ដោយសារចរន្តទឹកហូរខ្លាំងពីទំនប់នៅក្បែរនោះ។

គួរបញ្ជាក់ថា គ្រោះថ្នាក់តាមទូក គឺតែងកើតមានធម្មតា នៅនីហ្សេរីយ៉ា ក្នុងរដូវភ្លៀងធ្លាក់ ដោយសារតែបទប្បញ្ញត្តិសុវត្ថិភាពខ្សោយ និងទូកផ្ទុកលើសទម្ងន់។ អាជ្ញាធរបានប្រាប់ថា គ្រោះថ្នាក់កាលពីថ្ងៃអាទិត្យនោះ គឺដោយសារការផ្ទុកលើសទម្ងន់ និងហេដ្ឋារចនាសម្ព័ន្ធផ្លូវធ្វើដំណើរមិនល្អ ដែលបង្ខំឲ្យអ្នកស្រុកជាច្រើនពឹងផ្អែកលើការដឹកជញ្ជូនតាមផ្លូវទឹក៕