ក្រុមមន្ត្រី និងប្រភពបានប្រាប់សារព័ត៌មានរ៉យទ័រ កាលពីថ្ងៃអង្គារ (១៩ សីហា) ថា ក្រុមអ្នករៀបចំផែនការយោធារបស់សហរដ្ឋអាមេរិក និងសម្ព័ន្ធមិត្តអឺរ៉ុប ណាតូ បានចាប់ផ្តើមស្វះស្វែងរកជម្រើសធានាសន្តិសុខក្រោយជម្លោះសម្រាប់ទីក្រុងគីវ បន្ទាប់ពីការសន្យារបស់លោកប្រធានាធិបតីអាមេរិក Donald Trump ក្នុងការជួយការពារអ៊ុយក្រែន នៅក្រោមកិច្ចព្រមព្រៀងណាមួយដើម្បីបញ្ចប់សង្រ្គាមរបស់រុស្ស៊ី។

អ៊ុយក្រែន និងសម្ព័ន្ធមិត្តអ៊ឺរ៉ុបរបស់ខ្លួន កំពុងតែមានទំនុកចិត្តកាន់តែខ្លាំងដោយការសន្យាជួយធានាសន្តិសុខសម្រាប់ទីក្រុងគីវរបស់លោក Trump ក្នុងអំឡុងពេលកិច្ចប្រជុំកំពូលមួយកាលពីថ្ងៃចន្ទសប្ដាហ៍នេះ ប៉ុន្តែសំណួរជាច្រើននៅតែមិនទាន់មានចម្លើយ។

ប្រភពពីមន្រ្តីបានប្រាប់រ៉យទ័រថា មន្ទីរបញ្ចកោណកំពុងអនុវត្តផែនការស្វែងរកជម្រើសលើការគាំទ្រដែលទីក្រុងវ៉ាស៊ីនតោន អាចផ្តល់ជូនអ៊ុយក្រែន លើសពីការផ្តល់សព្វាអាវុធ។ ប៉ុន្តែប្រភពក៏ព្រមានថា ជម្រើសណាមួយនឹងត្រូវការពេលវេលាសម្រាប់អ្នករៀបចំផែនការរបស់អាមេរិក និងអឺរ៉ុបក្នុងការកំណត់នូវអ្វីដែលអាចធ្វើទៅបានទាំងផ្នែកយោធា និងអាចទទួលយកបានចំពោះវិមានក្រឹមឡាំងផងដែរ។

ប្រភពដែលដឹងពីកិច្ចពិភាក្សាបានឱ្យដឹងទៀតថា ជម្រើសមួយក្នុងចំណោមនោះគឺការបញ្ជូនកងកម្លាំងអឺរ៉ុបទៅអ៊ុយក្រែន ប៉ុន្តែដាក់ឱ្យអាមេរិកជាអ្នកទទួលបន្ទុកបញ្ជាការ និងគ្រប់គ្រង ហើយទាហានទាំងនោះមិននៅក្រោមស្លាកណាតូទេ ប៉ុន្តែនឹងប្រតិបត្តិការក្រោមនាមប្រជាជាតិរបស់ពួកគេផ្ទាល់។ យ៉ាងណាមិញ ក្រសួងការបរទេសរុស្ស៊ី បានច្រានចោលយ៉ាងដាច់ខាតនូវការដាក់ពង្រាយទាហានពីប្រទេសណាតូ ក្នុងការជួយធានាកិច្ចព្រមព្រៀងសន្តិភាពបែបនេះ៕