ភ្នំពេញ៖ ថ្មីៗនេះ ក្រសួងមុខងារសាធារណៈ សហការជាមួយក្រសួងសុខាភិបាល និងភាគីពាក់​ព័ន្ធ​បាន​ជ្រើសរើសមន្ត្រីវិជ្ជាជីវៈបច្ចេកទេសសុខាភិបាល ដែលជាមន្ត្រីផ្អែក​លើ​កិច្ច​ព្រម​ព្រៀង​ការងារ​ដើម្បីបម្រើការងារនៅតាមមណ្ឌលសុខភាពទូទាំងប្រទេស តាមរយៈការប្រឡង​ប្រជែង​ផ្អែក​លើ​និយាមនី​តិវិធី​ប្រតិបត្តិ​នៃ​ការប្រឡង​ប្រជែង​ជ្រើស​រើស​មន្ត្រី​ដែល​រាជរដ្ឋាភិបាល​បាន​ដាក់​ចេញ​។

ទន្ទឹមនឹងការជ្រើសរើសមន្ត្រីក្នុងបរិបទថ្មី ជាមន្ត្រីផ្អែកលើកិច្ចព្រមព្រៀងការងារនេះ ឯកឧត្តម យក់ ប៊ុនណា បានរំលេចក្នុងកិច្ចប្រជុំបច្ចេកទេសពាក់ព័ន្ធនឹងការរៀបចំគោលការណ៍ និងនីតិវិធីនៃការតែងតាំង ការផ្លាស់ប្តូរ និងការបញ្ចប់មុខតំណែងគ្រប់គ្រងនៅអង្គភាពសុខាភិបាលមូលដ្ឋាន និងគ្រឹះស្ថានសិក្សាសាធារណៈ នាថ្ងៃទី១៩ ខែសីហា ឆ្នាំ២០២៥ថា "ការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារជាការកែទម្រង់ដ៏ធំមួយ លើការគ្រប់គ្រងធនធានមនុស្សក្នុងរដ្ឋបាលសាធារណៈ។"

ឯកឧត្តមរដ្ឋលេខាធិការប្រចាំការ នៃក្រសួងមុខងារសាធារណៈ លើកឡើងបែបនេះ ដោយចង់បង្ហាញក្រុមការងារពីសារៈសំខាន់នៃការងារប្រចាំថ្ងៃ និងការងារការកែទម្រង់រដ្ឋបាលសាធារណៈ ដែលក្រសួងមុខងារសាធារណៈក្រោមការងារដឹកនាំរបស់ឯកឧត្តមឧបនាយករដ្ឋមន្ត្រី ហ៊ុន ម៉ានី បាន និងកំពុងដឹកនាំធ្វើប្រកបដោយភាពប្រទាក់ក្រឡាគ្នាពីមួយទៅមួយ និងជាពិសេសការឆាប់សម្រេចបានសមិទ្ធផលដែលចូលរួមគាំទ្រដល់ការអនុវត្តគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា។

សូមជម្រាបថា ការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារ ឬដែលហៅថា «ប្រព័ន្ធនិយោជន៍» ជាការបំពេញការងារបន្ថែមពីលើប្រព័ន្ធបច្ចុប្បន្នដែលមានស្រាប់ហៅថា «ប្រព័ន្ធអាជីព»។ ការរៀបចំនេះ ជាការកែលម្អប្រព័ន្ធគ្រប់គ្រងមន្ត្រីរាជការ ដើម្បីជ្រើសរើសមន្រ្តីឱ្យកាន់តែចំតម្រូវការ ជាមួយគុណវុឌ្ឍិ ចំណេះជំនាញ បច្ចេកទេស វិជ្ជាជីវៈច្បាស់លាស់ សំដៅជួយលើកកម្ពស់ ប្រសិទ្ធភាពនៃការប្រើប្រាស់ធនធានមនុស្ស និងដោះស្រាយបញ្ហាប្រឈមក្នុងប្រព័ន្ធបែបអាជីព រួមមាន បញ្ហាលើសប៉ុន្តែខ្វះមន្ត្រីនៅតាមក្រសួង ស្ថាប័ន, កង្វះមន្ត្រីមានជំនាញពិតប្រាកដឆ្លើយតបនឹងតម្រូវការនៃការងារ, ការអភិវឌ្ឍសមត្ថភាពមន្រ្តី ស្របតាមការវិវត្តនៃសង្គម, ឥរិយាបថ និងផ្នត់គំនិតជាដើម៕