យោងតាមអ្នកជំនាញខាងយោធា និងសព្វាវុធរបស់សហរដ្ឋអាមេរិក បានប្រាប់សារព័ត៌មានរ៉យទ័រថា ទន្ទឹមនឹងការកសាងកម្លាំងយោធាដ៏ច្រើនសន្ធឹកសន្ធាប់ ប្រទេសចិនបានចាប់ផ្តើមបង្កើនយ៉ាងឆាប់រហ័ស និងជានិរន្តរភាពនៃទំហំ និងសមត្ថភាពនៃកងកម្លាំងនុយក្លេអ៊ែររបស់ខ្លួន។

យោងតាមព្រឹត្តិបត្រព័ត៌មានរបស់ស្ថាប័នក្រុមអ្នកវិទ្យាសាស្រ្តអាតូមិក (The Atomic Scientists) ដែលជាអង្គការមិនរកប្រាក់ចំណេញមានមូលដ្ឋាននៅទីក្រុងឈីកាហ្គោ បានឱ្យដឹងថា ប្រទេសចិនកំពុងពង្រីក និងធ្វើទំនើបកម្មឃ្លាំងអាវុធរបស់ខ្លួន លឿនជាងថាមពលនុយក្លេអ៊ែរផ្សេងទៀត ហើយបានប្រមូលផ្តុំក្បាលគ្រាប់ប្រហែល ៦០០គ្រាប់។

នៅក្នុងរបាយការណ៍មួយរបស់ខ្លួន មន្ទីរបញ្ចកោណបានប៉ាន់ប្រមាណថា កងទ័ពរំដោះប្រជាជនចិន PLA នឹងមានក្បាលគ្រាប់នុយក្លេអ៊ែរប្រតិបត្តិការច្រើនជាង ១.០០០គ្រប់ នៅឆ្នាំ២០៣០ ខណៈទីក្រុងប៉េកាំង កំពុងស្វះស្វែងកសាងកម្លាំងឱ្យកាន់តែធំជាងនេះ។

នៅក្នុងគោលនយោបាយការពារជាតិឆ្នាំ២០២៣ ប្រទេសចិនបានបន្តការសន្យាយូរអង្វែងរបស់ខ្លួនថា ចិននឹងមិនក្លាយជាអ្នកប្រើអាវុធនុយក្លេអ៊ែរមុននោះទេ ទោះក្នុងកាលៈទេសៈណាក៏ដោយ។ ក្រសួងការពារជាតិរបស់ចិន បាននិយាយថា ខ្លួនប្រឆាំងនឹង ការប៉ុនប៉ងណាមួយដើម្បីបំភាន់នូវអ្វីដែលគេហៅថា "ការគំរាមកំហែងនុយក្លេអ៊ែររបស់ចិន" ក្នុងកិច្ចប្រឹងប្រែងមួយដើម្បីបង្អាប់ និងបង្ខូចកេរ្តិ៍ឈ្មោះរបស់ចិន និងចេតនាបំភាន់សហគមន៍អន្តរជាតិ៕