ក្រុមអ៊ីស្លាមនិយមហាម៉ាស បាននិយាយកាលពីថ្ងៃចន្ទថា ខ្លួនបានអនុម័តសំណើបទឈប់បាញ់មួយ ហើយរបាយការណ៍ប្រព័ន្ធផ្សព្វផ្សាយបាននិយាយថា វារួមបញ្ចូលទាំងការដោះលែងចំណាប់ខ្មាំងដែលនៅរស់ចំនួន១០នាក់។ ប៉ុន្តែអ៊ីស្រាអែលពុំទាន់បានឆ្លើយតបនៅឡើយ។ សំណើនេះត្រូវបានសម្របសម្រួលដោយប្រទេសអេហ្ស៊ីប និងកាតា។

ប្រព័ន្ធផ្សព្វផ្សាយក្នុងតំបន់បាននិយាយថា ផែនការសំណើរបានអំពាវនាវឱ្យមានបទឈប់បាញ់រយៈពេល៦០ថ្ងៃ និងការបន្តឡើងវិញការចរចាដើម្បីបញ្ចប់ជម្លោះ។

អ្នកនាំពាក្យក្រសួងការបរទេសកាតា លោក Majed Al-Ansari បាននិយាយថា ក្រុមអ្នកសម្របសម្រួលបានទទួល «ការឆ្លើយតបជាវិជ្ជមាន» ពីក្រុមហាម៉ាស ប៉ុន្តែពួកគេនៅតែរង់ចាំចម្លើយរបស់អ៊ីស្រាអែល។ លោកបានព្រមានថា ការមិនបានឈានដល់កិច្ចព្រមព្រៀងមួយ អាចនាំឱ្យមានមហន្តរាយមនុស្សធម៌កាន់តែអាក្រក់។

ប្រព័ន្ធផ្សព្វផ្សាយអ៊ីស្រាអែលបាននិយាយថា រដ្ឋាភិបាលកំពុងបន្តទាមទារឱ្យដោះលែងចំណាប់ខ្មាំងទាំងអស់ក្នុងដំណាក់កាលមួយ។ អ៊ីស្រាអែលនិយាយថា ក្រុមហាម៉ាសបានឃុំខ្លួនចំណាប់ខ្មាំង៥០នាក់ ហើយប្រហែល២០នាក់ត្រូវបានគេជឿថានៅរស់។ កងកម្លាំងការពារអ៊ីស្រាអែល កំពុងពង្រីកការវាយលុករបស់ខ្លួនលើតំបន់ហ្កាហ្សា។