ជំនួយការប្រធានាធិបតី និងជាប្រធានអ្នកចរចារ រុស្ស៊ីលោក Vladimir Medinsky បានសរសេរនៅលើបណ្តាញ Telegram របស់ខ្លួនថា ស្របតាមកិច្ចព្រមព្រៀងទីក្រុងអ៊ីស្តង់ប៊ុល ប្រទេសរុស្ស៊ី បានប្រគល់សាកសពទាហានអ៊ុយក្រែនចំនួនជាង ១.000នាក់ ខណៈដែលទីក្រុងគីវ បានត្រឡប់មកវិញត្រឹមតែ ១៩នាក់។

លោកបានសរសេរថា៖«ដូចដែលបានព្រមព្រៀងគ្នានៅទីក្រុងអ៊ីស្តង់ប៊ុល យើងបានប្រគល់សាកសពទាហានអ៊ុយក្រែនជាង ១.000នាក់ ទៅឲ្យភាគីអ៊ុយក្រែននៅថ្ងៃនេះ ខណៈដែលសាកសពទាហានរុស្ស៊ី ១៩នាក់ ត្រូវបានប្រគល់ត្រឡប់មកវិញ ដែលជាចំនួនដូចគ្នាកាលពីមួយខែមុននេះ»។

កាលពីថ្ងៃទី ២៣ ខែកក្កដា ទីក្រុងអ៊ីស្តង់ប៊ុល បានធ្វើជាម្ចាស់ផ្ទះនៃជុំទី៣នៃកិច្ចចរចាដោយផ្ទាល់រុស្ស៊ី-អ៊ុយក្រែន។ រុស្ស៊ី និងអ៊ុយក្រែន បានយល់ព្រមដោះដូរជនស៊ីវិល រួមជាមួយនឹងសមាជិកយោធា។ រុស្ស៊ីបានស្នើអ៊ុយក្រែនឲ្យបង្កើតក្រុមការងារតាមអនឡាញចំនួន ៣ក្រុម ដើម្បីដោះស្រាយបញ្ហានយោបាយ យោធា និងមនុស្សធម៌។ បន្ថែមពីលើនេះ ទីក្រុងមូស្គូ បានប្រគល់សាកសពទាហានអ៊ុយក្រែន ៣.000 នាក់ផ្សេងទៀត ទៅកាន់ទីក្រុងគីវ និងបន្តការផ្អាកប្រយុទ្ធគ្នាលក្ខណៈមនុស្សធម៌រយៈពេលខ្លីនៅជួរមុខ ដើម្បីប្រមូលយកអ្នករបួស និងអ្នកស្លាប់។

លោក Medinsky បាននិយាយថា ការសម្រេចចិត្តរៀបចំកិច្ចចរចាជុំទី៤ នឹងត្រូវធ្វើឡើង បន្ទាប់ពីកិច្ចព្រមព្រៀងចុងក្រោយបង្អស់ ត្រូវបានអនុវត្ត។