រដ្ឋអាជ្ញាប៉ូឡូញ នៅថ្ងៃពុធ (ទី២០ ខែសីហា) បានឲ្យដឹងថា បើយោងតាមការរកឃើញបឋម បានបង្ហាញថា វត្ថុដែលបានធ្លាក់ និងផ្ទុះក្នុងវាលពោតមួយ នៅភាគខាងកើតនៃប្រទេសប៉ូឡូញ គឺជាយានដ្រូនយោធា។

គួរបញ្ជាក់ថា ប្រទេសប៉ូឡូញនៅតែស្ថិតក្នុងការប្រុងប្រយ័ត្នខ្ពស់ ចំពោះវត្ថុនានាដែលចូលក្នុងដែនអាកាសរបស់ខ្លួន ចាប់តាំងពីមីស៊ីលអ៊ុយក្រែន បានធា្លក់ចូលដោយចៃដន្យ នៅភូមិភាគខាងត្បូង Przewodow ក្នុងឆ្នាំ២០២២ ដោយបានបណ្ដាលឲ្យមនុស្ស ២នាក់ស្លាប់។

រដ្ឋអាជ្ញាប្រចាំតំបន់របស់ខេត្ត Lublin លោក Grzegorz Trusiewicz បានប្រាប់អ្នកសារព័ត៌មានថា៖ «ការពិនិត្យមើលការផ្ទុះនោះ បង្ហាញថា វត្ថុនោះទំនងជាយានដ្រូនយោធា»។ លោកបានបន្ថែមថា យានដ្រូននោះត្រូវបានបំផ្លាញដោយការផ្ទុះ។

នគរបាលបានរាយការណ៍នៅមុននេះថា វត្ថុមិនស្គាល់អត្តសញ្ញាណមួយ បានធ្លាក់នៅក្នុងវាលស្រែមួយ ក្នុងតំបន់ Osiny ក្នុងខេត្ត Lublin ភាគខាងកើត ដែលជាប់ព្រំដែនអ៊ុយក្រែន។ ការផ្ទុះនោះបានបណ្ដាលឲ្យកញ្ចក់ផ្ទះជាច្រើនខ្នងបែក ប៉ុន្តែមិនមាននរណាម្នាក់រងរបួសនោះឡើយ។ មន្ត្រីបានរកឃើញបំណែកដែក និងប្លាស្ទិកដែលឆេះនៅកន្លែងកើតហេតុ។