យោធាអ៊ីស្រាអែលនិយាយថា ខ្លួនបានចាប់ផ្តើមដំណាក់កាលដំបូងនៃការវាយលុកដោយថ្មើរជើងដែលបានគ្រោងទុក ដើម្បីដណ្តើមកាន់កាប់ទីក្រុងហ្កាហ្សាទាំងមូល ខណៈខ្លួនបានគ្រប់គ្រងតំបន់ជាយៗរបស់ទីក្រុងនេះរួចហើយ។    

អ្នកនាំពាក្យយោធាបាននិយាយថា កងទ័ពកំពុងប្រតិបត្តិការរួចហើយនៅក្នុងតំបន់ Zeitoun និង Jabalia ដើម្បីដាក់មូលដ្ឋានគ្រឹះសម្រាប់ការវាយលុក ដែលរដ្ឋមន្ត្រីការពារជាតិអ៊ីស្រាអែល លោក Katz បានអនុម័តកាលពីថ្ងៃអង្គារ ហើយដែលនឹងត្រូវបានដាក់ទៅកាន់គណៈរដ្ឋមន្ត្រីសន្តិសុខនៅចុងសប្តាហ៍នេះ។   

កងកម្លាំងបម្រុងប្រហែល៦០.០០០នាក់ កំពុងត្រូវបានកោះហៅសម្រាប់ដើមខែកញ្ញា ដើម្បីចាប់ផ្ដើមត្រៀមកម្លាំងជាបុគ្គលិកដែលមានកាតព្វកិច្ចសកម្មសម្រាប់ប្រតិបត្តិការនេះ។  

ទីភ្នាក់ងារសារព័ត៌មាន Reuters បានរាយការណ៍ថា ក្រុមហាម៉ាស បានចោទប្រកាន់អ៊ីស្រាអែលថាបានរារាំងកិច្ចព្រមព្រៀងបទឈប់បាញ់ ដើម្បីបន្តសង្រ្គាមដ៏ព្រៃផ្សៃប្រឆាំងនឹងជនស៊ីវិលស្លូតត្រង់។

ប្រជាជនប៉ាឡេស្ទីនរាប់រយពាន់នាក់នៅក្នុងទីក្រុង ហ្កាហ្សា ត្រូវគេរំពឹងថា នឹងត្រូវបានបញ្ជាឱ្យជម្លៀសចេញ ហើយឆ្ពោះទៅកាន់ទីជម្រកនៅភាគខាងត្បូងហ្កាហ្សា ខណៈការត្រៀមរៀបចំសម្រាប់ផែនការដណ្តើមកាន់កាប់របស់អ៊ីស្រាអែល កំពុងដំណើរការ។  

សម្ព័ន្ធមិត្តជាច្រើនរបស់អ៊ីស្រាអែលបានថ្កោលទោសផែនការរបស់ខ្លួន ដោយប្រធានាធិបតីបារាំងលោក Emmanuel Macron បានព្រមានកាលពីថ្ងៃពុធថា សកម្មភាពយោធានេះ អាចនាំទៅរកគ្រោះមហន្តរាយសម្រាប់ប្រជាជនទាំងពីរ និងហានិភ័យដែលធ្វើឲ្យតំបន់ទាំងមូលធ្លាក់ចូលទៅក្នុងវដ្តនៃសង្រ្គាមអចិន្ត្រៃយ៍៕